Riot ng 2 gang: 1 patay

MANILA, Philippines - Isang lalaki ang nasawi makaraang ma­saksak sa naganap na rambulan sa pagitan ng  grupo ng una na Batang Clover Gang (BCG) at Batang Hamog Gang (BHG) sa lungsod Quezon, kahapon ng madaling-araw.

Ang biktima na nakilala lamang sa pa­ngalang alyas Balong ay nagawa pang ma­itakbo sa pagamutan, pero idineklara ding dead on arrival.  

Ayon kay PO2 Louie Serbito, natukoy naman ng ilang testigo ang sumaksak sa biktima sa alyas na Gino na miyembro ng BHG.

Nangyari ang insidente sa may harap ng Cloverleaf Market na matatagpuan sa Barangay Balingasa, ala-1 ng madaling- araw.

Diumano, nagkrus ang landas ng grupo­ ni Balong at BHG naman ni Gino sa nasabing lugar kung saan sa hindi mabatid na dahilan ay biglang nag-iringan ang mga ito na nauwi sa matinding riot.

Sa rambulan, bigla na lamang uma­nong nagbunot ng patalim si Gino at tinad­tad ng saksak sa buong katawan si Balong, bago nahinto ang laban at tulu­yang nagsitakas ang mga ito.

Patuloy ang imbestigasyon ng otoridad sa nasabing insidente.