MANILA, Philippines - Nasunog ang gusali ng banko matapos sumabog ang bagong istelasyong power supply kamakalawa ng gabi sa Makati City.
Sa inisyal na imbestigasyon ng mga awtoridad, dakong alas-9:20 ng gabi nang mamataan ng mga security guard na sina SG Trajano at Adviento ang makapal na usok na nagmumula sa sinasabing gusali ng Banco de Oro sa panulukan ng Makati Avenue at Dela Costa Street. Sinundan ito ng pagsabog mula sa basement 3 ng parking area kung saan patuloy na naglagablab.
Kaagad namang rumesponde ang Special Weapon Action Tactical (SWAT) Team ng Makati City PNP maging ang mga tauhan ng pamatay-sunog.
Dakong alas-11:30 ng gabi nang maapula ang sunog kung saan lumalabas sa imbestigasyon na sumabog ang bagong power supply.
Wala namang napaulat na may nasugatan sa insidente kung saan inaalam ng mga awtoridad ang halaga ng pinsala. (Lordeth Bonilla)