Umiwas sa aresto, hulog mula 4th floor, lasog
MANILA, Philippines - Dahil umano sa pag-iwas na maaresto ng mga pulis, nahulog mula sa ika-4 na palapag ng isang gusali ang isang 27-anyos na lalaki na ikinasawi nito, sa Sampaloc, Maynila, kamakalawa ng hapon.
Nakilala ang nasawi na si Jonathan Ganuelas, part-time mechanic at residente ng M. dela Fuente St., Sampaloc, Maynila.
Ayon sa ulat, dakong alas-3 ng hapon nang maganap ang insidente sa “301 Del Mundo Mansion”, na matatagpuan sa #1916 Calamba St., Sampaloc.
Nabatid na nagsagawa ng drug operation ang pulisya sa lugar matapos makatanggap ng impormasyon na may nagaganap na ‘ratratan’ ng droga o pot session doon.
Nang dumating ang mga pulis ay mabilis na nagsipanakbuhan ang mga nagdo-droga.
Nang akyatin ng mga operatiba ang gusali ay nadatnan ang dalawang lalaki kabilang ang biktima, na nakaupo sa bilog na mesa habang may hawak na paraphernalias sa pagsinghot ng shabu.
Habang ang tumatakas na si Ganuelas ay sa 4th floor nais magtago at nagdaan sa pamamagitan ng terrace at tumalon upang makaiwas sa mga tumutugis na pulis. Sinawimpalad itong mahulog na naging dahilan ng kanyang kamatayan. (Ludy Bermudo)
- Latest
- Trending