Minabuti pa ng isang binata na magpakamatay sa pamamagitan ng paglagok ng silver cleaning solution matapos malaman na nagpakasal sa iba ang kanyang girlfriend sa Navotas kamakalawa ng gabi. Hindi na umabot ng buhay sa Tondo Medical Center matapos uminom ng silver cleaning solution si Mark Jason Hernandez, 18 ng Galicia St., Bangkulasi ng lungsod.
Sa ulat, alas-9:30 ng gabi nang maglason ang biktima sa loob ng kanilang bahay. Nabatid na dinamdam ng biktima ang pagpapakasal sa iba ng kanyang nobyang hindi na nakuha ang pangalan. Samantala, nagpakamatay naman ang isang guwardiya nang magbaril sa loob ng outpost ng binabantayang opisina sa Valenzuela City kahapon ng umaga. Patay na nang idating sa Valenzuela General Hospital sanhi ng tama ng bala sa kaliwang dibdib si John Joseph Caguioa, 20, guwardiya ng AMH Machine Tool Co. sa Don Pedro st., Marulas ng lungsod. Alas-4:20 ng umaga, nakarinig ng putok ng baril ang mga kasamahang guwardiya ng biktima sa loob ng kanilang outpost sa nasabing kumpanya at nang puntahan ay doon nakita ang duguang biktima. Hindi pa malaman kung ano ang posibleng motibo sa pagpapakamatay nito habang nagsasagawa pa rin ng masusing imbestigasyon ukol dito ang pulisya. (Lordeth Bonilla)