Obrero inatado ng mga kaibigan

Labindalawang saksak sa iba’t ibang bahagi ng katawan ang tinamo ng isang obrero matapos na saksakin ng kanyang dalawang kaibigan sa Quezon City.

Dead-on-the spot ang biktima na nakilalang si Danilo Sy, deepwell driller, at naninirahan sa Happyland Compound, Brgy. Commonwealth, Q.C., matapos na magtamo ng malalalim na saksak sa katawan.

Pinaghahanap naman ng pulisya ang mga suspect na nakilalang sina Nilo Luna at Noel Elpon, sinasabing mga kaibigan at kapitbahay ng biktima.

Lumilitaw sa imbestigasyon ni PO3 Jun Mortel ng Central Police District-Criminal Investigation Unit (CPD-CIU), naganap ang insidente dakong alas-9 ng gabi sa loob mismo ng naturang compound.

Naglalakad si Sy nang bigla itong sugurin ng saksak ng mga suspect hanggang sa humandusay.

Nabatid na dating magkakaibigan ang biktima at mga suspect hanggang sa mainggit ang huli sa una na siyang naging ugat ng kanilang alitan.

May hinala rin ang pulisya na nagkainggitan sa trabaho ang biktima at mga suspect dahil ang mga ito’y walang permanenteng trabaho.

Kasalukuyan pa ring nagsasagawa ng follow-up operation ang pulisya upang agad na madakip ang mga tumakas na suspect. (Ulat ni Doris Franche)