Giintriga ang linihokan

Dear Tito Miguel,

Ako diay si  Zelard , 24 anyos, taga Labangon , Cebu City. Ingon sila, duna ko’y dugong berde , kay mokiay daw ko. Seguro usahay, mura ko og mokiay tungod  kay mahinhin man gud ko nga pagkalalaki. Pero para nako, dili man ko gay, kay babaye man ang akong maibgan sukad pa kaniadto. Usaon nako pag-deal ang duda sa mga tawo? Kapoy kaayo og explain nila nga straight gyud ko nga lalaki. Gani duna nako’y girlfriend ug hapit na usa ka tuig ang among relasyon. —Zelard 

Zelard,

Ayaw’g deal ug ayaw’g eksplikar nila unsa imong pagkatawo. Wala sila’y labot sa imong linihokan ug sexual preference. Tutal sigurado man ka unsa ka, dili na kini mistil ibandera pa. Maski gani nagduha-duha pa ka’g unsa ka, wala gihapon kay obligasyon ipahibawo kini sa tanan. Ang imong lihok ug sekswalidad  kay personal nga butang, dili nimo angay ipangatarungan. Ang importante maayong tawo lang ka ug patas sa uban. Apan tinuod, ang maong mga pasangil ug pangutana makapungot, labi na’g sensitibo ka, dili tungod kay naa kay gitago, apan tungod kay sila nakialam sa imong pribado nga kinabuhi. Kun duna gyud direkta mangutana unsa ka, daghan og  pamaagi unsaog tubag. Mahimo nimo sultihan sa tinuod, apan timan-i dili gihapon sila motuo, kay igo ra ka nila gisungog sungog. Kumbinsido na sila nga dili ka straight.

Puwede sab nimo ipaagi’g binuang, ingna sila’y mohukom tutal sila may interesado makahibawo. Aron magmalinawon ilang hunahuna, kay basin gidamgo na ka nila. Pangutan-a’g naa ba kay kapareha’g nawong nga artista. Kun moingon wala, ingna abi nimo nasaypan ka nga artista kay nganong interesado sila nimo, sikat diay ka. Kun moingon duna, ingna daan ko pa, kay ilang pangutana para ra sa mga sikat nga artista.

Mahimo sab dili nimo tagdon, pahiyom lang. O dili ba kaha tan-awa’g maayo ilang mga mata, ingna mura’g duna sila’y muta, o dili ba kaha ang ilong, ingna dunay kugmo, o ang ngipon, ingna dunay kamunggay, sigurado ma-distract sila.  Tito Miguel

Magpatambag ka? Ipada kang Tito Miguel: 0991-318-936