Deadma ang Ex-BFF

Dear Tito Miguel,

Makatawa ko's akong ex-bff. Wa jud siya ni greet nako pag-birthday nako recently. Pero naglibog ko which part ko nagkatawa: Nga wala gyud siya ni greet nako or nakatawa ko sa akong self kay effort kay ko every birthday niya and two days before my birthday nag chat pami nga I prayed for his healing and happy kay ko nga naayo na siya, yet bisag one liner greeting wala gyud.

Dili nako siya i-message uy. Kapoy! Pero naglibog ko'g unsay iyang drama. Which part kaha ang ako gyung nahimut-an?  —Clueless

Clueless,

Dili mapunting asa ka nahimuot apan klaro nga naa ka sa malipayon nga lugar sa kinabuhi. Kay maski wala siya nitimbaya sa imong adlaw natawhan, nagpabilin ka nga malipayon. Buot pasabot sa kinailadman ang kalipay nimo nagtubod. Ipasalamat kana dili tanang tawo karon nakasinati ana. Wa ka manginahanglan sa ubang tawo aron ka makompleto. Gani, ikaw ang nagsabwag sa kalipay sa uban, apil na imong higala nga kalit napawong sa okasyon nga siya unta magpatigbabaw.

Pero basin sab naa siya sa lugar nga wala’y signal, o dili ba kaha wala siya’y katakus  mopaabot sa iyang mensahe nimo. Pero kun dugay na kaayo, posible nangluod imong amigo. Kun wa kay mahunahunaan nga angay niya pangluoran, diha ang lagmit naa. Kay ang hinungdan sa pangluod ang luoran ray nakasabot. Abi nimo nahatag nimo tanan apan duna pa diay kuwang. Ang pangluod tungod kay duna silay gilaoman nga wa nimo matuman. Unsao’g tuman sa wa nimo nahibaw-an? Mao kini ang lisod kay ang nangluod dili mosulti, naghuwat sila nga ikaw mismo modiskubre.

Tingali inig Pasko padalhi siya’g mensahe, ayaw usa karon kay basin moingon nanagat ka’g happy birthday. Karon inig timbaya nimo’g malipayong Pasko kun di gihapon motubag nimo ingna lang nga naa ra ka andam maminaw kun sa inyong paghigalaay duna moy angay hisgotan. Kun di dihapon magkahisnang, pasagdi lang, basta imo na gibuhat ang tanan. Usbi inig bag-ong tuig, kun di gihapon pasagdi magpabilin sa kagahapon. Basta ikaw andam mosugat sa bag-ong tuig nga malipayon.  —Tito Miguel