Gustong makuha

Dear Tita Salie,

Maayong adlaw kanimo, Tita. Usa ako ka inahan nga naghambin karon og hilabihan ka dakong problema ug wala na ko masayod kun unsay angay nakong buhaton.

Duna koy 3 kabuok mga anak ug mga dagko na kini sila. Duna koy 1 ka babaye ug graduate na karon sa Criminology, ug ang 2 ka lalaki hapit na usab sila mahuman sa pag-eskuyla.

Sakit kaayo, Tita, nga nabulag ko sa akong mga anak. Ako silang gitalikdan sa akong nahiaguman. Nilayas ko sa among panimalay tungod kay grabe kaayo mobun-og ang akong bana.

Karon gimingaw na kaayo ko nila, Tita. Bisan unsa na lay akong gibuhat aron mabuhi ko, bisan unsa na lay akong tinda-tinda aron duna ko’y kwarta. Mahadlok na usab ako nga mopauli sa among balay kay tingali kun patyon ko sa akong bana.

Nisumbong na ko sa among kapitan ug nag-hearing na mi katulo na apan wala mi magkasinabot. Unsa may akong buhaton, Tita? Palihog pasabta ko. Thank you and God bless.

* * *

Maayong adlaw,puwede man seguro nga makigkita ka sa imong mga anak nga kamo-kamo lang ug dili na kinahanglan pahibaw-on ang imong bana. Matud mo nga dagko na ang imong mga anak, so puyde na nimo silang sekretohan pagpakigkita. Puyde nimo silang tawgan o teksan sa celfon ug magsabot mo. Puyde kang mamalihog sa inyong silingan o ang amiga sa imong anak ug pasultian ang mga bata nga gusto kang makigkita kanila.

Karon panahona dili kana angay mahadlok nga dapatan sa imong bana tungod kay duna na man kitay balaod aron pagprotektar sa atong mga kabataan ug mga kababayen-an. I-report siya o ipa-blotter aron duna na siya’y record ug magduhaduha na siya pagdagmal kanimo. Tungod kay sa panahon nga iyaha kining usbon pagbuhat puyde na siyang dakpon ug prisohon.

Busa ayaw kahadlok ug palaban sa atong balaod. Dili na siya makapugos kanimo nga makigbalik, kun dili na nimo gusto. Pakigkita sa imong mga anak kay duna kay katungod kanila. -- Tita Salie