Awit ug gugma - Gula 1

Tukma gayud kaayo ang mga lyrics sa kanta ni Barry Manilow nga “Somewhere Down the Road” sa kinabuhi ni Edgar ug Nelia.

Gipiyong ni Edgar ang iyang mga mata samtang gipaminaw niya pag-ayo ang lyrics sa kanta. Takulahaw lang nga nanumbalik sa iyang kaisipan ang matam-is ug mapait nila nga kaagi ni Nelia.

Duna’y bana si Nelia apan tua sa Muntinlupa napriso kay nakapatay. Gikaila ni Edgar si Nelia kay usa siya sa mihatud sa bana niini ngadto sa New Bilibid Prisons kay usa man ka jailguard sa Cebu City Jail si Edgar.

Nagkarelasyon si Nelia ug Edgar dihang wala pa mabalhin sa Muntinlupa ang bana ni Nelia. Gihulagway gani si Edgar sa iyang mga kauban nga gwardya nga hilabihan ka swerte niini kay bag-o pa’ng minyo si Nelia ug sa iyang bana.

Nasuod pag-ayo ni Edgar si Nelia dihang natabangan kini niya atul nga nanginahanglan og kwarta nga ikabayad sa abogado atul sa hearing sa kaso sa iyang bana.

“Higugmaon ko gayud ikaw hangtud sa hangtod Nel ug magpaabot ko nga hatagan og katumanan sa Makagagahum ang atong gugma,” kanunay’ng litokon kini’ng maong mga pulong ni Edgar samtang sila magkauban si Nelia kaniadto.

Diha’y higayon gani nga gitanyagan ni Edgar si Nelia nga magtipon na lang sila tungod kay reclusion perpetua ang silot sa bana niini ug nagpasabot nga dili mominus 20 ka tuig ang pagkabilanggo.

Apan bisan og daku usab og gugma si Nelia kang Edgar nadala siya sa tambag sa iyang mga ginikanan nga angay’ng putlon ang ilang relasyon tungod kay daku kining sala.

“Sori kaayo Edgar, dili angay’ng magpadayon ang atong relasyon,” naghilak si Nelia nga misulti sa iyang hukom-pakigbuwag kang Edgar atul nga sila didto sulod sa usa ka motel.

Miabot gayud ang adlaw nga nagkalagyo sila si Edgar ug Nelia. Alang kang Edgar daw mikalit lang pagkisdom ang kalibutan dihang wala na niya makauban si Nelia.

Haw-ang kaayo ang iyang kinabuhi. Daghang mga gabii nga dili mahimutang si Edgar. Hangtud nga nakahukom siya nga lingawon ang iyang kaugalingon pinaagi sa pagsulod og mga bar panahon sa gabii.

Didto sa bar nga gikaila ni Edgar si Althea, usa ka singer. Nadani kaayo si Edgar sa nindot kaayo’ng tingog ni Althea. Kanunay na nga mobalik si Edgar sa bar hangtud nga gikasuod niya ang singer.

Nakabatyag si Edgar nga may pagbati siya kang Althea. Diha’y higayon nga nakahigayon siya pagdapit ni Althea nga manuroy. - Sumpayan