Matam-is ang Paghandom

Gula 2

Gitutokan pag-ayo ni Ely ang hulagway ni Shenna. Takulahaw lang nga ang iyang kaisipan giganoy sa usa ka halawom nga paghanduraw.  Gihandom ni Ely kadtong hitabo nila ni Shenna atul sa pagbisita niya didto sa apartment sa dalaga.

Wala na masakripisyo si Ely pagpanguyab ni Shenna kay tungod sa ilang kasuod, anam-anam ra nga mibati'g gugma ang usa'g-usa kanila. Usa ka higayon sa pagpamisita ni Ely sa apartment ni Shenna, mikalit lang pagbunok ang kusog kaayong ulan.

Mora'g naglain ang panahon kay naglugitum sa kangitngit ang kaibabwan. Daw linubi nga mais nga gisaliyab sa atup nga siyan ang nadungog nila ni Ely ug Shen. Taud-taud, nagpusot-pusot ang kusug kaayo nga dugdog.

Ang maong sitwasyon sa panahon maoy nakatintal kanila ni Ely ug Shen nga magparayganay aron sa pagpabatyag sa kainit sa ilang kalawasan sa usa'g-usa. Mingaw g'yud kaayo sa apartment ni Shen kay ang iyang ka-boardmate unya pa sa gabii moabut.

Nagkainit ang ilang pagparayganay ni Ely ug Shen hangtud nga gidaug sila sa tentasyon ug gidimdim nila ang katam-is sa pagminahalay. "Ang nahitabo kanato Shen maoy nagmatuod nga imo g'yud diay ko nga gimahal," giingnan ni Ely ang dalaga.

Gisaaran ni Ely ang iyang girlfriend nga dili molubad ang iyang pagpangga sa dalaga. Nasubli pa sa makadaghan ang ilang pagtagay sa kalipay. Dunay mga higayon nga moapas na si Shen sa gitrabahoan ni Ely. Ihatud ni Ely si Shen sa iyang gipuy-ang apartment.

Dihay higayon nga samtang nag-atang og kasakyan sila si Ely ug Shen, kalit lang may mihunong nga motorsiklo sa ilang atubangan. Nagngisi ang sakay sa motor sa dayon niining pakli sa itum nga plastic nga nagtabon sa iyang panagway.

"Ikaw man diay ni Philipp, abi nako'g sakop na sa vigilantes," matud ni Ely ngadto sa iyang higala. Mipasiklap si Philipp kang Shen nga diha nagbarug sa tupad ni Ely. "Mao ni ang imong bag-o?" hagawhaw ni Philipp ngadto sa iyang higala.

"Mao g'yud," abtik nga tubag ni Ely nga nagpahiyom. "Unya may miting ra ba kita karon nilang Allan ug Cris," gipahinumdoman ni Philipp si Ely.

Mihangad si Ely ug dayon miyango-yango. "Tuod no. Hala, ihatud pa raba nako ni si Shen, unya mopauli pa ko sa akong giabtan," matud ni Ely nga nagpitok-pitok ang mata nga mora'g may gihuna-huna.

"Pwede man 'sab og iangkas na lang nako kining imong gwapa nga chicks aron moderitso ka na lang pagpauli," tanyag ni Philipp sa higala. Tuod gihangyo ni Ely si Shen nga moangkas na lang ni Philipp kay may tambongan pa diay siya nga miting. (Sumpayan)