Kining Sky Is The Limit kan-anan nga moserbisyo lang panahon sa kagabhion ug maoy gitanyag nga mga pagkaon ang puso ug barbeque. Gitawag kini og Sky Is The Limit kay nahimutang man kini sa open area diin wala’y atop ang mga kan-anan. Dugokan kini sa mga tawo matag gabii.
Samtang naghulat sila si Vera ug Angeline sa gipaluto nilang barbeque, milingkod si Angeline sa bakanteng lingkoranan nga bag-o lang gibiyaan sa duha ka kostumer. Ang iyang mga mata didto ra sa barbeque nga gipunayan og kabkab sa lalaki nga nagluto. Unya takulahaw lang may nakakabig sa iyang pagtagad. Mitingkad ang iyang mga dalunggan nga nakakita nila ni Erik ug Almina.
Sila si Eric ug Almina miduol sa stall nga nalayo og diyotay sa nahimutangan ni Angeline. Nagpaluto sab sila og barbeque. Unya mipahimutang ang duha sa bakante nga lamesa. Si Angeline midali pagtindog ug miduol sa gibarogan ni Vera. Dili siya buot nga makit-an siya ni Erik.
“Tana,” apura ni Angeline.
“Kadiyot lang,” matud ni Vera. “Wa pa maluto ang barbeque. -- Sumpayan pa