Gula 83
Igo lang siyang nakaabot sa banyo, midigwa siya. Misuka siya taman sa ginhawa. Apan pulos laway ang iyang gisuka. Hagkot nga laway.
Nakamata si Mr. Salvador sa iyang pagdigwa. Miduol kini kaniya.
“Naunsa ka, Hon?” Sukit niini.
“Wa kini kaso,” niya pa. “Panuhot ra tingali ni.”
“Mas maayo tingali nga magpahiling ka og doktor,” sugyot sa bana.
Nagpatan-aw tuod si Jody sa usa ka doktor. Babaye nga mananambal ang naghiling kaniya. Mapahiyomon ang doktor human mahiling ang iyang lawas.
“Congratulations, Misis,” sa doktor pa. “You are already three months pregnant.”
Wala makasabot si Jody sa managlahing pagbati nga nagdibal sa iyang kahiladman pagkasayod niya sa iyang kahimtang. Ang iya lang nasabtan mao nga nalipay siya. Ug nakaseguro siyang malipay usab si Mr. Salvador kun masayod na kini nga nagsabak na siya.
Hingpit na usab ang dagan sa kinabuhi ni Jody sa iyang kaminyoon kang Mr. Enrique Salvador. Misamot ang ilang kamalipayon dihang nakabaton na sila og usa ka anak nga babaye. -- Sumpayan pa