Lovers in Pari-an

 Gula 63

“U-unsa? U-unsa, unsay may imong tubag?”

“Aw, akong giingnan nga tinud-anay ang paghigugma nako nimo. Ug nagkahigugmaay na tang duha.”

“Unsa may iyang reaksiyon sa imong gisulti?”

“Miingon siya nga suwerte kuno kaayo ko kay nakatumong ko og babaye nga lig-on og baroganan sama nimo.”

“Mao ra nay inyong gipanagsultihan?”

“Gipasabot sab ko niya bahin sa iyang gitanyag nga kahigayonan nimo. Iya kong giingnan nga dili ko angay mabalaka bahin sa iyang gitanyag nimo tungod kay dili maoy iyang tumong ang pagguba sa atong relasyon. Gusto lang kuno siyang motabang sa imong mga igsuon. Interesado gayod usab kuno siyang mangasawa nimo. Pero kun isalikway mo ang iyang tanyag ug akoy imong palabihon, dili siya mahimong babag sa atong paghigugmaay. Andam gani kuno siyang motabang nato kun magminyo na kita.”

“M-mao kanay iyang gisulti nimo?”

“Oo. Nakasabot baya ko sa tumong ni Atorni, Ros. Buotan gyud kaayo siya.

“Naikog na hinuon ko niya karon. Mora bag mibati na hinuon ko’g kaluoy niya.”

“B-Bongkoy...” -- Sumpayan pa