Lovers in Pari-an

Gula 48

“Gikan kong mitubag sa sugo sa lawas. Dihang mobalik na unta ko sa akong lawak, nakalantaw ko dinhi sa swimming pool. Nahibulong ko pagkakita sa usa ka babayeng nagbarog. Maong miduol ako aron magsusi. Ikaw man diay kini.”

“Maayo hinuon nga miduol ka aron di na ko mag-inusara dinhi. Wa ka pa diay usab matulog?”

“Di ko makatulog, Ros. Nagsige ko’g hunahuna nimo.”

“U-unsa?”

“Mao kana. Kun pugson nako’g piyong ang akong mga mata, makita ko na hinuon ang imong panagway nga magkatawa.”

“B-Bongkoy...”

“Gimahal tikaw, Ros. Gipaningkamotan ko ang pagpapas niining pagbatia sa akong dughan tungod kay nasayod kong wa kini katumanan sanglit may hinigugma ka na man. Apan di gyud nako kalimbongan ang akong kaugalingon. Ikaw gayod ang gipitik sa akong kasingkasing.”

Wala makatingog si Rosalinda. Nabatyagan niya nga dihay bahin sa iyang kahiladman nga ingon sa natukbil sa gipamulong ni Bongkoy.

“Daw sa mabuang ko ning pagbatia, Ros,” ni Bongkoy pa. “Usahay gani, makahukom na lang kong mobiya dinhi aron dili ko na ikaw makita ug mahikalimot na ako kanimo.” --Sumpayan pa