Kilometro 35

Gula 83

Wala madugay sa pagbagting sa telepono, gipunit kini didto sa pikas tumoy sa linya. Tingog sa lalaki ang akong nadungog. Kang Sheldon.

“Kumosta ka, Sheldon Abrigos?” Giingnan ko siya.

“K-kinsa ka?” Nakapangutana siya nga ingon sa wala makasinati sa akong tingog sa telepono.

“Wa ka na ba diay makaila kanako? Ako kini, ang hinigugma sa lalaki nga imong gipatay didto sa Kilometro 35!”

“S-sandra? i-ikaw kini!”

“Oo. Maayo kay nahinumdom dayon ka kanako, Sheldon.”

“U-unsay imong tuyo?”

“Gusto lang nakong sutaon kun unsay imong gibati karon nga patay na si Karl Padon ug ikaw na ang sunod kong likidahon.”

“Huh! Animal kang dako! Wa ko mahadlok nimo, Sandra.”

“Wa sab ko manghadlok nimo, Sheldon. Gipasidan-an ta lang ka aron di ka magmahay nako.” Aron ka makapangandam sa akong pagpaningil nimo.”

“Pakita nako, Sandra, kay panitan ta ka.”

“Sure. Magpakita ko nimo, Sheldon. Asang dapita ang imong gusto nga adto ta magkita?”

“Bisag asa atubangon ko ikaw, Sandra. Di ka makapatay nako sa dakong kasayon. Di ko sama sa hungog kong mga barkada nga imong napatay.”

“Tan-awon ta lang, Sheldon.”

“Asa ta magkita?”

“Sa sam-ang sa barangay Magtago. Ugma, untop alas dose sa udto!”

Human sa panagsulti namo ni Sheldon sa telepono, gisuginlan nako si Keith mahitungod sa among gikasabotan.

“Makigkita ka kaniya?” Sukit ni Keith.

“Oo,” nako pa. “Aron matibway na ang tanan!” -- Sumpayan pa