Gawilan nilangoy unang gold ng Team Philippines
MANILA, Philippines — Nilangoy ni Filipino swim ace Ernie Gawilan ang unang gold medal ng Team Philippines sa 5th Asian Para Games matapos maghari sa men’s 400-meter freestyle S7 event kahapon dito sa Rainbow Pool ng Nagoya City General Gymnasium sa Nagoya, Japan.
Nagsumite ang 35-anyos na tubong Davao City ng bilis na apat na minuto at 56.72 segundo para ungusan sina Zhang Yilong (5:01.36) at Toh Wei Soong (5:24.23) ng Singapore.
Sapat na ang oras ni Gawilan para makakuha siya ng tiket sa 2028 Los Angeles Paralympics, ayon kay national para swimming coach Tony Ong.
“He’s already qualified in the 2028 LA Olympics because of his time,” sabi ni Ong kay Gawilan na nakamit ang kanyang ikatlong sunod na gintong medalya sa nasabing event at pang-lima sa kabuuan matapos ang three-gold haul sa 2018 Jakarta Games at isa sa Hangzhou, China noong 2023.
Tumapos naman si Edwin Villanueva sa 10th place sa men’s 400-meter freestyle S8, habang ika-12 si Muhaimin Ulag sa men’s 200-meter individual medley SM9.
Sa Izu Velodrome, pumuwesto sina Patrick Lee at Arthus Bucay sa 12th at 14th sa track cycling 1,000m time trial.
- Latest
