Mga sting ray nakompiska sa DVMF diha sa merkado sa Inayawan
CEBU, Philippines — Gikompiska sa sakop sa Department of Veterinary Medicine and Fisheries ang 1.250 kilo nga kiyampaw o sting ray diha sa Inayawan Public Market niadtong Oktubre 10, 2026.
Matud sa DVMF nga ang lalaki nga manindahay nakalapas sa City Ordinance 2496 o Special Protection of Sharks, Rays, and Chimaeras Ordinance diin hugot nga ginadili ang pagpamaligya sa mga endangered, threatened ug giprotektahan nga marine species ubos sa maong ordinansa aron maprotehian ang kadagatan.
Sa pagpakighinabi sa Banat News sa supervisor sa DVMF nga si Maria Merlyn Mirallo nagkanayon kini nga ang nasakpang mamaligyaay taud-taod na’ng namaligya sa maong merkado ug usa ka buwan na’ng nakadawat ang ilang buhatan og reklamo kabahin sa maong ilegal nga pagpamaligya og kiyampaw.
Ang mga kiyampw giingong naggikan pa sa Dakbayan sa Talisay apan sa Inayawan kini gipamaligya.
Dihang naatlan sa DVMF ang maong manindahay nga positibo nga namaligya kini og kiyampaw giisyuhan kini og citation ticket.
Ang maong manindahay nga gipugngan ang pangalan sa DVMF makamulta ngadto sa P5,000 o adunay purohan nga mapriso sulod sa usa ka tuig.
Sa pagsuwat niining balita wala pa mobisita sa buhatan sa DVMF ang maong nasakpang manindahay og kiyampaw.
Ug kong dili mahusay ang kalapasan niini sulod sa lima ka adlawa padalhan kini og final notice hangtud nga ipatawag na kini ngadto sa City Legal Office. BDB BANAT NEWS
- Latest
