Namaligya’g yuta gidakop

CEBU, Philippines —  Usa ka 58-anyos nga negosyante ang gidakop sa mga operatiba sa Criminal Investigation and Detection Group (CIDG) Lapu-Lapu City Field Unit  pinaagi sa usa ka entrapment operation may kalabotan sa giingong estafa  niadtong Biyernes sa hapon Setyembre 18, 2026.

Ang suspek nga residente sa Barangay Palanas, Ronda, Cebu.

Kabahin kini sa flagship project sa CIDG nga “OLEA,” usa ka entrapment operation batok sa giingong paglapas sa Article 315 sa Revised Penal Code o Estafa.

Sumala sa otoridad , nagsugod ang operasyon dunay mireklamo nga usa ka prospective buyer nga si alyas Vange kay nasuta niini nga peke o malimbongong transaksyon sa yuta nga nahimutang sa Proper Bonsai, Barangay Bolinawan, Carcar City, Cebu.

Matud sa CIDG, gi-offer  sa suspek ang maong yuta sa kantidad nga P40 milyones ug nakadawat na kini og down payment gikan sa buyer.

Apan, base sa impormasyon nga nadawat sa CIDG, posible nga nabaligya o na-transfer na sa laing tawo ang maong property.

Apan nipakita ang suspek og mga dokumento nga nagpakita nga naa pa sa iyang ngalan ang yuta ug mahimo pa niya kining ibaligya.

Nakig-coordinate ang CIDG sa DENR-CENRO aron susihon ang tinuod nga tag-iya ug kahimtang sa property, lakip ang pag-verify sa mga dokumentong gipakita.

Base sa certification gikan sa DENR-ARGAO CENRO, ang maong yuta sakop sa Free Patent Application No. 072214-217 nga nakapangalan gyud sa suspek.

Apan nakabutang usab sa certification nga wala pa’y patent nga na-isyu para sa maong property sa panahon sa pag-verify. Nagpasabot nga wala pa kini titulo ubos sa iyang pangalan.

Matud pa sa dinakpan nga wala siya namaligya og yuta nga dili iyaha og dako na siya gastos aron matitulohan.

"Nangita ko og paagi para maka transfer or maka process ko ug maka register nangita ko og kwarta. Nangutang para makakuha ko anang yutaa," matud ni Fannie kinsa nangangkon nga padung pa mogawas ang titulo sa maong yuta.

Atol entrapment operation, nakuha gikan sa suspek ang usa ka tinuod nga P1,000 bill nga gigamit isip dusted money, usa ka bundle sa papel nga nagrepresentar sa P1 milyon, paper bag, PSBank check, duha ka klase nga ID, usa ka Tecno smartphone, ug Contract to Sell. Dugang pa sa otoridad naaresto na si Fannie kaniadto pinaagi sa warrant of arrest tungod sa kaso sad nga estafa ubos sa Article 315, Paragraph 2(D) sa Revised Penal Code ug nalista isip Regional Most Wanted Person Level 6.

Giandam  na sa mga kapolisan  ang mga dokumento para sa pagsumiter sa tukmang criminal complaint sa Cebu Provincial Prosecutor’s Office alang sa inquest proceedings.

Samtang ang dinakpan kasamtangan gibalhug karon sa Custodian Facility sa CIDG RO7.