10 patay sa dengue sa Cebu City
CEBU, Philippines — Nakatala ang City Health Department og 1,228 ka kaso sa dengue sa Dakbayan sa Sugbo gikan sa Enero hangtud sa Hulyo 18 niining tuiga ug 10 na ang namatay gumikan sa maong sakit.
Gibutyag ni Konsehal David “Dave” Tumulak, tsirman sa committee on health sa konseho sa siyudad nga kasagaran sa mga naapektohan mao ang mga bata nga nagpangedaron og usa ka tuig hangtud sa 10-anyos.
Sa pinakaulahing monitoring gikan Hulyo 12 hangtud sa Hulyo 18, adunay 17 ka bag-ong kaso sa dengue nga natala sa siyudad.
Matud ni Tumulak nga ang sunod-sunod nga pag-uwan sa siyudad ang hinungdan nga nagpundo ang tubig sa mga kanal ug wala kini matagad sa paglimpiyo.
Ang mga napundong tubig ug mga basura nga nakaali sa dagan sa tubig nahimong kapangitlogan sa mga lamok nga nagdala sa dengue.
Lakip sa mga barangay nga adunay labing daghang kaso mao ang Guadalupe nga adunay 80 ka kaso, gisundan sa Basak San Nicolas nga adunay 64, Lahug nga adunay 57, Labangon nga adunay 53 ug Tisa nga adunay 48 ka kaso.
Nitala usab ang daghang kaso sa Mambaling nga adunay 44; Kalunasan adunay, 40; Punta Princesa adunay, 37; Pasil, 36; Camputhaw, 34; Duljo Fatima, 34; Quiot, 34; Talamban, 34; Ermita, 29; Sambag II, 28; San Nicolas, 28; ug Sawang Calero, 28.
Samtang, adunay mas ubos nga kaso nga natala sa Sirao nga 10; Santo Niño, lima; Kamagayan, lima ug San Antonio, lima usab.
Gihangyo ni Tumulak ang mga residente nga magmatngon ug magtinabangay sa pagsumpo sa dengue human sa pagsaka sa mga kaso karong tuiga.
Dugang pahimangno ni Tumulak nga magmabinantayon pinaagi sa regular nga paglimpiyo sa mga lugar nga adunay napundong tubig aron dili kini mahimong kapangitlogan sa mga lamok.
Giawhag ni Tumulak ang paggamit og mosquito repellent ug moskitero isip dugang proteksiyon batok sa dengue. Ug kong adunay sintomas sama sa hilanat ug uban pa’ng timailhan sa dengue kinahanglan kini nga moduol sa barangay health center o magpakonsulta sa doktor aron malikayan ang grabeng komplikasyon. BDB BANAT NEWS
- Latest
