Trak vs motorbike: 2 dedo

LEGAZPI CITY Albay , Philippines  - Patay ang rider at kaangkas nito habang sugatan naman ang isa pa makaraang sumalpok ang kanilang motorsiklo sa kasalubong na trak sa kahabaan ng Maharlika Highway sa Barangay Batang sa bayan ng Pamplona, Camarines Sur kamakalawa ng umaga. Kinilala ang mga namatay na si Milan Albino, 17, ng Brgy. Poblacion; at Rica Mandasoc, 18, ng Brgy. Del Rosario habang ginagamot naman sa Mother Seton Hospital ang sugatang si Karen Gonzales. Sumuko naman sa pulisya ang driver ng trak na si Danilo Agarin, 60, ng Barangay 51 Buyuan, Legazpi City, Albay. Base sa police report na nakarating sa Camp Simeon Ola, lumitaw na inagaw ng motorsiklo ng mga biktima ang kabilang linya ng highway kaya sumalpok sa kasalubong na truck (MGF-488) ni Agarin. Isinugod si Albino at Mandasos sa Bicol Medical Center sa Naga City subalit kapwa idineklarang patay.