Centralized system sewerage gilantaw nga tukoron sa JICA

CEBU, Philippines — Gilantaw sa Japan International Cooperation Agency (JICA) ang pagtukod og centralized system sa sewerage nga posibleng moserbisyo sa tibuok Metro Cebu diin ang Dakbayan sa Mandaue giila nga pilot area alang sa unang hugna sa proyekto.

Niadtong Huwebes nagtigom ang mga stakeholder sa Dakbayan sa Mandaue alang sa presentasyon sa Initial Environmental Examination (IEE) sa unang hugna sa planong pagtukod sa sewerage system sa Mandaue Service Area.

Gipirmahan ang record of discussions alang sa maong proyekto niadtong Abril 2024.

Giplanong tukoron ang Centralized Sewerage Treatment Facility sulod sa Mandaue Green Learning Center Park sa Barangay Umapad.

Nipahigayon og feasibility study ang JICA kauban ang Hydronet Consultants ug nakaplagan nga ang Mandaue ang labing angay nga dapit aron sugdan ang pagtukod sa sewerage treatment system nga giplanong moabot sa tibuok Metro Cebu.

Gipadayag ni IEE consultant Dr. Danilo Jaque ang panginahanglan sa usa ka sentralisadong sewerage system tungod kay nagpadayon ang polusyon sa mga katubigan sa Metro Cebu nga resulta sa wala ma-treat nga wastewater.

Matod ni Jaque nga walay tukmang pasilidad alang sa pag-treat sa domestic wastewater hinungdan nga ang hugaw nga tubig deretsong moagas ngadto sa mga drainage system ug sa kataposan moabot sa mga sapa ug suba.

Gipasabot ni Jaque nga ang system mokolekta ug molimpiyo sa wastewater gikan sa walo ka local government units (LGUs) sa Metro Cebu gikan sa Compostela sa amihanang bahin sa Sugbo hangtud sa Dakbayan sa Talisay sa habagatan lakip na ang mga isla sa Mactan.

Apan alang sa unang hugna, magsentro una ang proyekto sa Dakbayan sa Mandaue diin upat ka barangay ang giila nga prayoridad nga mga lugar nga gilangkuban sa Maguikay, Alang-Alang, Ibabao-Estancia ug Casuntingan.

Ang mga nag-unang sewer pipeline giplanong moagi sa UN Avenue, Plaridel Street, M.C. Briones Street ug M.L. Quezon Avenue.

Gipili ang Mandaue isip pilot LGU base sa nagkadaiyang konsiderasyon lakip na ang epekto sa kalikupan, pinansiyal nga kapasidad, availability sa luna ug ang pagdawat sa siyudad sa maong proyekto.

Matud ni Phikkoei International Inc. Water Department Manager Deguchi Yosuke, usa ka Japanese consultant sa JICA nga wala pa sa pagkakaron ang Cebu og sentralisadong sewerage system nga nagsilbi sa tibuok siyudad. BDB BANAT NEWS