‘Mahjong Crazy’
Walang dudang ASIAN ako. CRAZY? Hmmm … medyo!
RICH? Depende sa kung saan at kung sa ano!
Well, Crazy Asian na lang para sigurado!
‘Yung RICH? Sandali lang at pag-iipunan ko!
Crazy Rich Asians na movie naman siguro
Eh marami nang nakapanood sa inyo,
‘Yun bang love story nina Nick Young at Rachel Chu,
Pirated napanood ko… kasi poor ako?
Ngek! CRAZING APOOR ASIAN ako ang biro ko!
At sana’y Nick YANG at Rachel CHOW bida rito
Nang pag sinangag at kinasal mga ito,
YANG – CHOW nasa wedding invitation! Eksakto!
Maraming nagtanong sa eksena sa dulo —
‘Yung mahjong scene at wala silang alam dito,
Kung bakit si Rachel tinapon ang eight bamboo
Na todas naman ni Mother at kanyang puro!
Buo nga ‘yung eight sticks sa wall n’ya at kumpleto,
At kasabay ng dramatic na dayalogo —
Kung matupad man pangarap sa anak nito,
Dahil sya’y nagbigay… sabay eight sticks binato!
Tila may butas “otso” at sumisimbolo
Sa isang singsing ‘yan ay pakiwari ko,
Tumuloy sa emerald ring sa eroplano…
Halos sinlaki ng pitsa ng madyong bato!
Ngunit ‘yung eksena sa madyong sa totoo,
Tumawa man kayo’y tumulo ang luha ko!
You know naman sigurong close to our hearts ito!
Iskul Bukol pa lang school namin ay WANBOL U!
At madyong na madyong nga kami ng utol ko!
He, he, he … ESCALERA nga ang apelyido!
Sa sampung taon magulo at nanggugulo!
Kahit hindi grumadweyt may AMBISYON na ‘no!
At sa t’wing maiisip natatawa ako
Na nasundan pa ito ng isang TV show
Na madyong na madyong din ang pamagat nito —
TODAS… tumagal din nang sampung taon ito!
At alam ba n’yong nung mga panahong ito,
Sa Iskul Bukol at TODAS ’pag break pareho,
Sa isang Channel 13 room nandun lang grupo…
Kung hindi sa pusoy… MAHJONG nagkokonsyerto!
Meron pa nga pala nung Kulit Bulilit Show
At si Imee Marcos gamit din ‘yun na kwarto!
Kaya malamang n’yan ay takang-taka ito
Na kwarto n’yay amoy lalaki’t sigarilyo!
Korek! Sa madyong konek ang halos lahat show!
At dahil comedians ay CRAZY na rin kuno!
Mga ASIAN kami at dito sumesweldo,
Marami nang kinita… RICH na rin siguro!
- Latest
- Trending
