Sumbat ng budhi
Dear Dr. Love,
Pinauuna ko na ang pasasalamat sa pagpapaunlak mong mailathala ang aking sulat.
Medyo nakakahiya ang aking kasaysayan kaya hayaan mo nang ikubli ko ang tunay kong pagkatao. Tawagin mo na lang akong Rosing, 24-anyos at isang plain housewife.
Ang aking asawa ay isang OFW at nagtatrabaho sa Saudi Arabia. Kada tatlong taon lang siya kung umuwi.
Dahil dito’y madali akong natukso nang makilala ko si Ramir. Ang problema ko ay ito.
Buntis ako ngayon ng dalawang buwan at kinokonsensya ako ng aking sarili.
Tama po ba kung ipalaglag ko ang sanggol alang-alang sa aming relasyong mag-asawa?
Pagpayuhan mo ako Dr. Love.
Rosing
Dear Rosing,
Hindi kita susumbatan sa nagawa mo. Lahat ng tao ay nagkakasala, iba-iba nga lang.
Ngunit ang ginawa mong pagkakamali ay huwag mong ituwid sa pamamagitan ng isa pang mas malubhang kamalian.
Dapat ay prayoridad palagi ng tao ang Panginoong Diyos at ang pagsunod sa Kanya.
Kapag ipina-abort mo ang bata, pumatay ka ng buhay bago pa man maisilang ito at pinigilan mo ang magandang plano ng Diyos para sa magiging supling mo.
Naging malakas ang loob mong magtaksil sa asawa mo kaya lakasan mo rin ang loob mo sa pagtanggap sa ibubunga ng iyong pagkakamali.
Dr. Love
- Latest
