Pumatol sa may-asawa

Dear Dr. Love,

Isa po akong masugid na tagasubaybay ng inyong malaganap na column. Gusto ko pong bigyang-daan ang sinapit ng aking nakakatandang kapatid, na pumatol sa may-asawa dahil sa pag-ibig.

Naniwala ang ate ko na tunay ang pagmamahal sa kanya ng isang lalaki, na pamilyado na. At sa sobrang paniniwalang tunay ang mga sinasabi ng lalaki, nakumbinsi siyang bumili ang rights ng lupang pinaniwala sa kanya na pag-aari ng gobyerno, na kalaunan aniya ay maaaring ariin bilang beneficiary. Sa lote po itong nagpatayo ng kanyang bahay ang kapatid ko.

Pero ang lahat ay nauwi sa matinding sama ng loob ng aking ate, dahil niloko lamang siya ng lalaki matapos mahuthutan. Nakasuhan pa ang kapatid ko dahil sa ilegal ang pagtatayo niya ng bahay sa napatayuang pribadong lote.

Bago pa man tuluyang matalo sa kaso si ate ay unti-unti nang dumidistansiya si Nilo sa kanya. Nagpaalam ito sa kapatid ko na uuwi muna sa kanyang tunay na pamilya dahil nabuko na raw siya ng kanyang misis. At para maiiwas ang ate ko sa eskandalo ay pakakalmahin muna raw niya ang kanyang asawa.  

Nagsimulang dumistansiya ang lalaking ito sa aking ate nang dumating ang tunay na may-ari ng lupa at sampahan sila ng demanda sa pang-aagaw ng lupa.

Ilang beses umapela ang ate ko pero tuluyan siyang natalo. Naubos na pang-legal fee ang naitatabi niyang pera mula sa pinarerentahang mga kuwarto sa pinatayo niyang bahay, na tuluyang giniba.

Dito naatake ang kapatid ko at ngayon ay inaa­lagaan naming magkakapatid. Awang-awa ako sa kapatid ko dahil sa sinapit niya. Sana magsilbing leksiyon ito sa mga inosenteng babae na napapaniwala sa matatamis na pangako ng lalaking nagkukunwaring tupa pero isa palang mabangis na asong gala.

Maraming salamat po sa pagbibigay daan ninyo sa liham kong ito.

Gumagalang.

Francia ng Bicolandia

Dear Francia,

Hindi dapat tayo nagbubulag-bulagan at nagbibingi-bingihan sa mga kahina-hinalang intensiyon ng taong nagkukunwaring mabait pero iba ang layunin, dahil lang sa mahal natin ang taong ito.

May mga bahagi ng kwento na nalalabuan ako. Gaya nang tungkol sa lupa. Maraming paraan para makumpirmang pribado ang isang lupa. At hindi ito basta mapapatayuan ng bahay sakaling tunay na may nagmamay-ari nito.

Magkagayunman, alam ng ate mo na pamilyado ang lalaking pinakisamahan niya pero nanatili siya sa pakikpagrelasyon. Sa sitwasyong ganito, laging babae ang talunan. Katulad ng sinapit ng iyong kapatid, bigla na lang siyang iniwan.

Natitiyak ko na kinapulutan ito ng aral ng ating mga mambabasa. Kasama ninyong magkakapatid ang pitak na ito sa panalangin para sa paggaling ng inyong ate.

DR. LOVE