Prosec: P612.5 milyong confi funds may ambag ordinaryong Pinoy

MANILA, Philippines — Ipinaalala ni House prosecution adviser ­Robert Ace Barbers sa mga Pilipino na ang P612.5 milyong confidential funds na kinukuwes­tiyon sa impeachment case ay nagmula rin sa kanilang mga bulsa. Dahil dito, aniya, ang usapin ay hindi lamang isang hidwaang pampulitika na kinasasangkutan ni Vice President Sara Duterte.

Ayon kay Barbers, ang halagang ito ay bahagi ng perang ambag ng mga ordinaryong Pilipino sa pamamagitan ng kanilang mga buwis, kabilang ang mga tindera sa palengke, drayber at maliliit na negosyante.

“Yang P600 million na ’yan, kontribusyon ’yan ng ating mga tindera sa kalsada, driver ng jeepney, driver ng tricycle, at maliliit na mga negosyante,” pahayag ni Barbers noong Miyerkules sa isang online media briefing.

Sinabi niya na dahil dito, dapat bigyang-pansin ng mga Pilipino ang impeachment trial at alamin kung paano ginamit ang pera ng bayan.

Hinimok ni Barbers ang publiko na subaybayan ang mga paglilitis, pakinggan ang mga ebidensiyang ihaharap ng magkabilang panig, at bumuo ng sariling pananaw sa halip na umasa lamang sa mga pahayag na ginagawa sa labas ng Senate Impeachment Court.

“Dapat subaybayan ng ating mga kababayan itong impeachment trial na ito,” ani Barbers. Dagdag niya, dapat makita mismo ng mga Pilipino ang mga ebidensiya upang “sila mismo ang bumuo ng kanilang opinion” batay sa mga inilalahad sa paglilitis.

Para kay Barbers, ang laki ng halagang sangkot ay sapat na dahilan upang maging mahalaga ang usapin kahit sa mga Pilipinong hindi interesado sa pulitika.

Aniya, nagmumula ang perang ito sa mga nagbabayad ng buwis na nagsisikap kumita para matustusan ang kanilang pang-araw-araw na pangangailangan at umaasang gagamitin nang maayos ang pondo ng pamahalaan.

Binigyang-diin ng pro­secution adviser na ang usapin ay hindi lamang tungkol sa kung dapat bang manatiling lihim ang mga confidential acti­vity. Ang mas mahalagang tanong, aniya, ay kung ang pondong publiko na inilaan para sa mga naturang aktibidad ay ginastos at na-liquidate alinsunod sa mga umiiral na patakaran.

Ipinaliwanag niya na bagama’t maaaring kailangang manatiling lihim ang mga detalye ng lehitimong intelligence at surveillance operations, dapat pa ring maipaliwanag at maitala nang maayos kung paano ginamit ang perang publiko para sa mga ito.

Dahil dito, sinabi ni Barbers na dapat ­seryosohin ng mga Pilipino ang usapin dahil bawat pisong sangkot ay mula rin sa pera ng mga nagbabayad ng buwis. Sinabi ni Barbers na nagbibigay ang impeachment trial ng pagkakataon sa publiko na suriin ang mga ebidensiya at matukoy kung sapat na naipakita ang mga alegasyon laban kay Duterte.