Testigo sa krimen gipatay

CEBU, Philippines — Taliwa sa gipatumang COMELEC (Commission on Elections) gun ban, giulo og pusil patay ang usa ka 18 anyos nga lalaki kinsa nag-angkas og motorsiklo sa laing duha ka mga nagsunod kanilang nagmotor  diha sa barangay Linao, lungsod sa Minglanilla niadtong Sabado sa hapon.

Ang biktima giila sa Minglanilla Police Station nga si Ramjey Cañedo taga Barangay Linao, Dakbayan sa Talisay samtang wala pa mailhi sa kapolisan ang drayber sa motorsiklo nga gisakyan sa biktima kay dali kining midagan ug gibiyaan ang biktima ug ang motorsiklo.

Sigun pa ni PO2 Arnel Resente, imbestigador sa maong kaso nga sa inisyal nga imbestigasyon nasuta nga silang Cañedo gikan sa Talisay ug giingong gisundan sa usa ka motorsiklo.

Sa dihang naabot na sila sa Minglanilla, giingong gitaparan sila sa mga mamumuno ug gidul-it pagpusil ang luyong bahin sa ulo sa biktima diin milusot ang maong bala sa walang bahin sa iyang agtang.

“Traffic man (sa Minglanilla) mao to naapsan sila. Gidul-it og pusil. Siya gyud ang tumong ato,” sigun pa ni Resente.

Matud ni Resente gidala pa sa Minglanilla District hospital ang biktima ug dayon gidali og balhin sa Vicente Sotto Memorial Medical Center apan pag-alas 9 sa gabii namatay kini.

Nakig-alayon karon sa Talisay Police Station ang Minglanilla human nasuta nga niadtong Abril 1 karong tuiga testigo ang biktima sa pagpusil patay sa iyang uyoan didto sa Talisay diin ang mamumuno giingong miyembro sa usa ka fraternity.

Kini karon ang gisubay sa kapolisan nga posibleng anggulo sa maong pagpatay.

Nasayran nga sa pagsugod sa election period niadtong Abril 14 gipatuman sa Comelec ang gun ban hangtod na mahuman ang election period sa Mayo 21.

Samtang sa barangay Pari-an, nasakpan atol sa buy-bust operation ang usa ka Patrick Tambog,38, taga Barangay Lorega San Miguel ning dakbayan sa Sugbo nga nagdala og unom ka bala sa .9mm, usa ka gamay nga pakete ug duha ka medium size nga paketeng pulos may sud nga gituohang shabu. - Erly Ann Alcontin, CNU Intern (BANAT NEWS)