Travel clearance sa mga minors gikinahanglan

CEBU, Philippines — Ang DSWD niawhag sa publiko nga kompletuhon ang dokumento sa pagkuha og travel clearance sa mga minor de edad nga mobiyahe sa gawas sa nasud nga dili kauban ilang ginikanan o kadtong “illegitimate child” nga dad-on sa ilang amahan sa biyahe.

Ang maong patakaran nalatid  sa Special Protection of Children batok sa pag-abuso, Exploitation and Discrimination Act and the Philippine Passport Act of 1996.

Sukad Enero hangtod Marso 2018, nakaisyu na ang DSWD 7 og 525 travel clearances.

Ilang giawhag ang publiko o kadtong mga nagplanong mobiyahe dala ang mga menor de edad nga di nila anak nga iproseso daan ang mga dokumentong rekisitos aron di sila malangay sa biyahe.

Ang mga rekisitos naglakip sama sa birth certificate gikan sa NSO, marriage contract sa ginikanan, application form gikan sa DSWD, notaryadong affidavit of consent sa mga ginikanan ug uban pa.

Matud ni Ma. Evelyn Macapobre  sa DSWD-7 paspas ra ang pagproseso sa travel clearance kay mahimo ra kini sud sa 24- oras basta kompleto ang mga dokumento ug assessment sa social workers.

Ang pag-isyu sa travel clearance usa ka pamaagi aron di maabuso ang mga bata. - Mary Mel V. Coma ug Rejena M. Sevilla, PIT Interns (BANAT NEWS)