Inter-local cooperation gidasig sa hunta probinsiyal

CEBU, Philippines - Giawhag sa hunta probinsiyal ang tanang component cities ug kalungsuran sa lalawigan sa Sugbo nga mogama og inter-local government cooperation o pagtinabangay sa pagpangita og sulosyon sa mga common issues ilabi na ang problema sa ginadiling drugas.

Gisubay ni Bokal Miguel Antonio Magpale ang Section 3 (f) sa Akta Republika 7160 nga ang mga lokal nga kagamhanan maghiusa ug magtinabangay sa paggama og mga lakang nga makahatag og kaayohan kanila.

Tipik sa resolusyon ni Magpale nagkanayon nga adunay nagkalain-laing problema nga nakaapekto sa mga lokal nga kagamhanan ug kinahanglan og dinaliang pagtagad sama sa ilegal nga drugas, problema sa trapiko, turismo ug kalikupan.

Ang kaso sa ilegal nga drugas lapad kaayo ug ang kampanya batok niini mahimong labing epektibo kun ang mga lokal nga kagamhanan magtinabangay. Hinungdan nga ang mandato batok sa ginadiling drugas kinahanglan nga pauswagon sa mga lokal nga kagamhanan.

Dugang niini, aron madasig ang tanang lokal nga kagamhanan sa pagpahigayon og inter-local cooperation, ang buhatan sa gobernador gihangyo nga mohatag og incentives alang niini.  (BANAT NEWS)