Kasong kriminal batok polis gibasura

CEBU, Philippines - Gi-dismiss sa piskaliya ang kasong kriminal nga gipasaka sa Fuente Police Station batok ni PO3 Neri Cahimat , ang pulis nga gisikop human unang gitudlo sa mga guwardiya sa usa ka imnanan sa Mango Square nga mipabuto og armas samtang nakig-inom  uban sa unom niya ka mga amigo.

Si Chief Inspector Aileen Recla, hepe sa Investigation and Detection Management Branch (IDMB)  mibutyag nga way mitestigo sa kaso human miatras sa iyang  reklamo ang duha ka mga guwardiya ug ang wala ‘sab pagka-recover sa armas nga gigamit sa pagpabuto maoy hinungdan nga na dismiss ang kasong criminal.

Si Cahimat gipasakaan og kasong indiscriminate firing ug alarm and scandal sa kapulisan sa Fuente Police.

Apan bisan pa man sa pagka- dismiss sa kasong kriminal, mag-atubang pa gihapon og kasong administratiba ang maong pulis tungod kay nakalapas kini sa National Police Commission Memo 2007-001 nga nagdili sa mga polis nga magpabadlong ilabina kung ubos sa ilimnon nga makahubog, matud pa ni Recla. Ang kaso giduso na sa Fuente Police Station sa Internal Affairs Service (IAS Cebu City).  Dugang pa ni Recla nga mahulog sa klasipikasyon sa “grave misconduct” ang gibuhat ni Cahimat.

“Imnanan na siya, so bawal g’yud ang magdala og armas, nagpabuto pa g’yud siya,” matud pa ni Recla. Apan gipasabot ni Recla nga naa na sa IAS ang paghusay sa maong kaso, ug igo na lang sila mohatag og dugang ebidensya aron mapalig-on pa ang kaso batok ni Cahimat.

Gipasabot sa opisyal nga kung ugaling makita man sa IAS nga guilty si Cahimat sa maong kaso, posibleng ma-demote kini. Si Cahimat kanhi nagranggo og Senior Police Officer One, apan tungod sa kaso niya kaniadto na-demote kini pagka Police Officer Three. Nasayran ‘sab sa Banat News nga girelibo na sa Mabolo Police Station si PO3 Cahimat ug kini giapil sa mga police nga ipaubos sa “back to basic training program” sa kapulisan dinhi sa dakbayan sa Sugbo.  (BANAT NEWS)