Dul-an 2,000 ka tawo gipamulta

CEBU, Philippines —  Mokabat sa 1,904 ka tawo ang nasikop sa kapolisan tungod sa nagkadaiyang paglapas sa lokal nga mga ordinansa sulod sa upat ka adlaw nga pagpatuman sa Safer Cities Initiative sa Cebu Police Provincial Office (CPPO) gikan Septiyembre 15 hangtod 18, 2026.

Sa report sa CPPO, 1,285 ka operasyon ang gilusad sa nagkadaiyang police units sa tibuok lalawigan sulod sa maong upat ka adlaw isip kabahin sa Anti-Criminality Plan.

Sa kinatibuk-ang 1,904 ka nasikop, 1,253 ang gipamulta, samtang 651 ang gipasidan-an ug gibuhian. Walay natalang violator nga gipasakaan og kaso atol sa maong mga operasyon.

Apan mokabat P654,950 ang kinatibuk-ang multa nga nakolekta sa kapolisan sulod sa upat ka adlaw.

Pinakadaghan sa mga paglapas ang may kalabotan sa city ug municipal traffic ordinances, diin mikabat sa 1,253 ka violators ang natala gikan Septiyembre 15 hangtod 18.

Gawas sa traffic violations, nasikop usab ang mga tawo tungod sa pag-inom og alkohol sa pampublikong lugar, pagpanigarilyo sa pampublikong lugar, paglaag sa kadalanan nga walay sinina sa ibabaw sa lawas, ug paglapas sa curfew sa mga menor de edad.

Niadtong Septiyembre 15, 449 ang nasikop sa 301 ka operasyon, diin 284 ang gipamulta ug 165 ang gipasidan-an ug gibuhian. Mikabat sa P166,550 ang multa niadtong adlawa.

Niadtong Septiyembre 16, laing 403 ang nasikop sa 307 ka operasyon. Sa maong ihap, 275 ang gipamulta samtang 128 ang gipasidan-an ug gibuhian, nga mikabat sa P135,550 ang nakolektang multa. Niadtong Septiyembre 17, 489 ang nasikop sa 322 ka operasyon. Gikan niini, 301 ang gipamulta ug 188 ang gipasidan-an ug gibuhian, samtang mikabat sa P138,450 ang multa.

Pinakadaghan ang nasikop niadtong Septiyembre 18, diin 563 ka tawo ang nadakpan sa 355 ka operasyon. Sa maong ihap, 393 ang gipamulta ug 170 ang gipasidan-an ug gibuhian, samtang mikabat sa P214,400 ang multa.