Sabotahe sa 4th bridge

Mosamot bang kalangay ang pagtukod sa ikaupat nga taytayan nga magsumpay sa mainland sa Sugbo ug isla sa Mactan? Naduhig ang proyekto sa kahangol sa mga kongresista. Ilang gilaslasan ang budget para sa foreign-assisted projects (FAP) aron pagpaburot sa budget sa ilang paboritong multi-purpose buildings (MPBs).

Sa National Expenditure Program nga gisumiter ngadto sa House of Representatives, nangayo si Presidente Ferdinand Marcos Jr. og ?8.57 bilyones para sa 4th bridge. Pero ?2.57 bilyones ray giaprobahan sa House. Gihiwa nilang ?6 bilyones. O 70% sa budget sa proyekto.

Kabahin lang sa mas dakong laslas nga ?73 bilyones sa FAP sa 2027. Ang ?117.74 nga gipangayo sa Malacañang nihiyos sa ?44.7 bilyones. Gipasimang sa House ang ?42 bilyones ngadto sa MPBs. Maong ang gahin sa Malacañang nga ?12.68 bilyones niburot ngadto sa ?55.38 bilyones.

Nganong allergic sa FAP pero ganahan sa MPBs ang mga kongresista? Ang FAP gidumala og loan agreements sa ubang kanasuran. Lisod panguwartahan. Ang MPBs walay feasibility studies ug walay klarong lugar nga tukoran. Mas sayon bunalan og 25% nga kickback.

Ang Cebu-Mactan 4th bridge mobalor og ?76.4 bilyones. Hunyo 2020 pang naaprobahan ang loan nga ¥119.225 bilyones (?48 bilyones) gikan sa Japan International Cooperation Agency (JICA). Gisugdan sa Septiyembre 2026 ug tapuson sa Disyembre 2030.

Gikatahong nagsugod nang pangandam sa pagbalhin sa apektadong mga pamilya sa Paknaan, Mandaue City, nga maoy sinugdanan sa taytayan. Samtang gipangitaan pa og pundo ang tugpahan nga coastal road sa Pusok, Lapu-Lapu City, paingon sa Mactan Cebu International Airport.

Angayng modemanda ang mga Sugbuanon og katin-awan gikan sa House sa paglaslas sa budget sa 4th bridge. Angay sang ipasabot sa DPWH unsang bahina sa proyekto ang malangay kon dili ibalik sa Senado ang budget ug kon malangay ba sang loan disbursements sa JICA.

Si Kongresista Cutie del Mar ray taga Sugbo nga nisupak sa House version sa 2027 budget. Silang Lolypop Ouano sa Mandaue City, Ahong Chan sa Lapu-Lapu City, ug ubang representante sa Sugbo pabor sa laslas sa counterpart fund sa 4th bridge. Angayng susihon pilay ilang nakuha nga dugang budget para sa kuwestiyonableng MPBs.