Lisensiyadong armas ang gigamit sa school shooting

CEBU, Philippines —  Lisensiyadong armas ang gigamit sa Grade 9 nga estudyanteng namusil sa sulod sa Banga National High School sa South Cotabato. Gipanag-iya ni sa iyang amahan matud pang  Interior Secretary Jonvic Remulla.

Sa press briefing kagahapon, September 19,  gibutyag ni Remulla nga ang amahan sa bata,  disaster risk mitigation officer sa Department of Education (DepEd) ug naa kini tulo ka lisensyadong armas. Apan matud pang Remulla, gitagoan ang maong mga armas sa vault apan naablihan kini sa bata ug maoy gigamit niini pagpamusil sa sulod sa ilang eskuylahan atong Biyernes, Septembre 18.

Tulo ka tawo ang patay, apil ang maong tinun-an ug walo ang naangol. Naay usa nga kritikal ang kahimtang sa tambalanan.

Nigawas sad sa imbestigasyon nga pipila ka oras sa wala pa ang hitabo, giingong gisultihan na niyang daan ang mga classmates nga papaulion sila inig human sa tingpaniudto kay duna siyay dautang buhaton.

Nagtuo lang sila nga komedya ra to. Tuod man nilakaw ang suspek ug sa pagbalik, namusil kini dayun. Human sa pagpamusil gikatahong nagpusil sab kini sa iyang kaugalingon.

Atong adlawa, Biyernes, gipaabot ni Presidente Ferdinand Marcos Jr. ang iyang pahasubo sa mga pamilya sa nakalas ug nangaangol ug nipasalig nga tabangan sila sa gobiyerno.

“Muli tayong nahaharap sa isang trahedyang hindi dapat danasin ng sinumang magulang, paaralan, o komunidad,” gimando niya nga palawman pa ang imbestigasyon ug mangita og paagi para  dili na kini masubli pa.