P205.56 bilyon nga benepisyo napagawas sa SSS

CEBU, Philippines — Mokabat na sa P205.56 bilyon nga benepisyo ang gipagawas sa Social Security System (SSS) ngadto sa mga miyembro, pensioner ug benepisyaryo gikan Enero hangtod Hulyo 2026.

Gipadayag ni SSS President ug Chief Executive Officer Robert Joseph M. de Claro nga padayon ang ahensya sa pagpalig-on sa social protection alang sa mga miyembro samtang gisiguro ang kalig-on sa pension fund sa dugay nga panahon.

Ang retirement ug death benefits maoy pinakadako nga bahin sa gipagawas nga benepisyo nga mikabat og P180.86 bilyon.

Lakip niini ang P110.83 bilyon alang sa regular pensioners ug P43.89 bilyon alang sa survivor pensioners.

Gipatuman usab sa SSS ang Pension Reform Program diin adunay tinuig nga pension increase gikan 2025 hangtod 2027.

Niining 2026, mokabat sa P6 bilyon nga dugang pension benefits ang gipagawas aron matabangan ang mga pensioner sa epekto sa inflation ug pagsaka sa gasto sa enerhiya.

Samtang, nakaabot sa P235.33 bilyon ang kontribusyon sa mga miyembro gikan Enero hangtod Hulyo, samtang ang kinatibuk-ang kita sa SSS mikabat sa P268.14 bilyon.

Ang investment portfolio sa SSS misaka usab sa P1.29 trilyon hangtod Hulyo, nga adunay annualized return on investment nga 4.64 porsiyento.

Gipalapdan usab sa SSS ang emergency loan program diin ang kwalipikadong miyembro mahimong makahulam og hangtod P20,000, nga adunay 7-porsiyentong interest kada tuig ug unom ka bulan nga repayment moratorium.

Gilusad usab ang SSS LoanLite, usa ka digital short-term loan facility nga mahimong ma-access pinaagi sa mga participating financial institutions.

Hangtud Hulyo, adunay 44.25 milyon ka covered members ug kapin usa ka milyon ka aktibong employers ang SSS sa tibuok nasud.

Gipalambo usab sa SSS ang Energy Sustainability Loan Program, diin ang kwalipikadong miyembro mahimong makahulam og hangtod P400,000 alang sa pag-instalar og solar panel system sa ilang panimalay.

Matud ni De Claro, padayon nga palig-onon sa SSS ang financial foundation niini, palapdan ang social protection ug pauswagon ang serbisyo samtang padulong kini sa ika-70 nga tuig.

Ang ika-69 nga anibersaryo sa SSS nagsunod sa tema nga “Bawat Isa Protektado, Bawat Bukas Sigurado.” — MEL BANAT NEWS