Gobernador sa Bohol midayeg sa PMI Boxing

CEBU, Philippines — Ang gobernador sa Bohol nga si Erico Aristotle “Aris” Aumentado midayeg og maayo sa PMI Bohol Boxing Stable ubos sa pagdumala ni Atty. Floriezyl Echavez Podot tungod sa walay hunong ug dedikadong paningkamot niini sa pagbutang sa probinsya sa kalibuntahong mapa sa boksing. Sa milabayng lima ka tuig, ang PMI sa kanunay mipahigayon og dagkong mga kalihukan nga nakahatag sa mga Bol-anong talento ingon man mga boksidor gikan sa Kabisay-an ug Mindanao og kahigayonan nga mapakita ang ilangh abilidad ngadto sa dako nga bantawan.

Ug maabot pa ang labing nindot.

Usa ka semana gikan karon, ang PMI mopasiugda sa labing dako nga pasundayag sa boksing sa kasaysayan sa Bohol.

Usa ka world title eliminator ug tulo ka regional championships nga naglangkob og upat ka mga nasud ang masaksihan sa giatngan nga “Kumong Bol-anon XXVI” karong Septiyembre 12 sa Bohol Wisdom School (BWS) Gymnasium sa Tagbilaran City.

"Ang Kagamhanang Probinsyal mapasigarbuhong kaabag sa PMI Bohol Boxing Stable sa pagpahigayon sa Kumong Bol-anon XXVI. Among gidayeg ang PMI Boxing Stable sa ilang makanunayong pagpamuhunan sa boksing ug sa pagpataas sa kalidad niini isip usa ka propesyonal nga paugnat sa kusog dinhi sa Bohol," matud pa ni Aumentado sa usa ka pamahayag. "Sukad niadtong 2023, ang Kagamhanang Probinsyal ug ang PMI Bohol Boxing Stable - ubos sa maalamong pagpangulo ni Atty. Floriezyl Podot - nanguna sa pagpalambo sa sports tourism sa Bohol ug sa paggamit sa gahom sa paugnat sa kusog isip plataporma alang sa kalamboan ug ekonomiya," dugang pa ni Aumentado.

"Pinaagi sa pagpahigayon sa Kumong Bol-anon XXVI, giablihan nato ang kahigayonan nga ipakita sa kalibotan ang kahanas sa mga Bol-anon sa paugnat sa kusog, samtang gipalambo ang ekonomiya, gipataas ang garbo sa mga lokal nga residente, ug gihulma ang mga kampiyon gikan sa grassroots level."

Si Aumentado mipadayag nga dako nilang garbo ug kalipay nga ang PMI Boxing mokulit na usab og kasaysayan pinaagi sa umaabot nilang promosyon diin sa main event mokumbati ang pambato nilang si Regie “Filipino Phenom” Suganob batok ni two-time world champion Sivenathi “Special One” Nontshinga sa South Africa sa usa ka International Boxing Federation (IBF) light flyweight elimination bout.

Sa undercards, si Reymart “Cebuano Assassin” Tagacanao makig-atbang ni Chinlin Kuwang sa China alang sa IBF Asia junior bantamweight belt, samtang sila Leonard “The Dreamer” Pores III ug Datu Adam makigharong batok sa mga Indonesian nga sila Andika Fredrikson “D’ Golden Boy” Ha’e ug Oky Akbar alang sa korona sa IBF Pan Pacific flyweight ug IBF Asia junior featherweight division.

"Usa kini ka lig-on nga pamatuod sa nagkadako nga dominasyon sa PMI Bohol Boxing Stable, dili lamang sa lokal ug nasudnong natad sa boksing, apan lakip na sa entablado sa kalibotan," dason pa ni Aumentado. 

"Naghatag kini og daghang kahigayonan aron atong mapakita ang matahum ug talagsaong mga talan-awon sa Bohol isip usa ka UNESCO Global Geopark Island, ang mainitong pagkamaabiabihon sa atong mga tawo, ang atong lig-on nga mga panag-uban ug pagdumala sa paugnat sa kusog, ug ang gugma sa atong mga tawo sa sports, ilabi na sa boksing."

Naglantaw sa unahan, si Aumentado mipasalig sa PMI sa hingpit nga suporta sa kagamhanan sa umaabot pa nilang mga kalihukan.

"To PMI Bohol Boxing Stable, always know that you have the 100 percent support of the Provincial Government," kanayon pa ni Aumentado.

"To Atty. Podot, thank you for your persistent efforts to raise the standard of professional boxing in Bohol and for creating more and more opportunities to our young Boholanos to join boxing and elevate their skills and potential," panapos pa ni Aumentado.