CSC sa government agencies: Mental health isulong

MANILA, Philippines — Kaalinsabay ng pagdiriwang ng Mental Health Awareness Month, pinaalalahanan ng Civil Service Commission (CSC) ang lahat ng ahensya ng gobyerno hinggil sa kahalagahan na isulong ang mental health ng aabot sa 1.9 milyong manggagawa sa buong bansa.

Sinabi ni CSC Chairperson Karlo Alexei Nograles, dapat kilalanin ng mga pinuno at opisyal ng ahensya na ang kalidad ng serbisyo publiko na ihahatid sa mga stakeholder ay nakasalalay sa pisikal at mental na kalusugan ng mga manggagawa sa gobyerno.

Sa ilalim ng CSC Resolution No. 1901265, ­inaatasan ang mga ahensya ng gobyerno na magtatag at magpatupad ng Mental Health Program (MHP) na isama sa kani-kanilang mga polisiya at programa sa pagpapaunlad at pamamahala ng HR upang magbigay ng inklusibo, kaaya-aya, at suportang kapaligiran sa trabaho para sa publiko, mga opisyal at empleyado.

Kaugnay nito, hinimok ni Nograles ang mga ahensya na higit pang isulong ang kapakanan ng mga empleyado sa pamamagitan ng pag-oorganisa ng mga team building activities, mga sports festival, support groups, at maging ang mga virtual na kaganapan tulad ng kamakailang natapos na online Zumba at pagpapalabas ng pelikula na ginanap sa ika-123 na PCSA.