Wala pang FDA-approved ‘monkeypox’ vaccine – DOH

MANILA, Philippines — Wala pang magagamit na bakuna sa bansa laban sa monkeypox na binibigyan ng emergency use authorization (EUA) ng Food and Drug Administration (FDA).

Gayunman, kinumpirma ni Health Secretary Francisco Duque III nitong Sabado na tinatalakay na ng DOH sa World Health Organization (WHO) kung saan makakabili ang bansa ng monkeypox antivirals, sakaling magkaroon ng outbreak nito sa bansa.

Sa kasalukuyan aniya, ay inihahanda na ng DOH ang supply chains at logistics services.

Inatasan na ni Duque ang Pharmaceutical Division ng DOH na makipagtulungan sa Research Institute for Tropical Medicine (RITM) at FDA upang maghanap ng posibleng available sources ng monkeypox vaccines.

Binanggit din niya ang posibilidad na gumamit ng Imvamune o Imvanex vaccine, na lisensiyado sa Estados Unidos laban sa monkeypox o smallpox.

Sinabi rin ng kalihim na ang mga smallpox vaccines ay maaaring magbigay ng proteksiyon laban sa monkeypox dahil sa “cross-protection.”

Una nang sinabi ng DOH na hindi pa kailangang magsara ng borders ng bansa dahil sa monkeypox.

Marami aniyang paraan para maiwasang makapasok sa bansa ang monkeypox, kabilang dito ang istriktong border control at symptoms screening, at pagtalima sa minimum public health standards.