17 milyong pamilya benepisyaryo sa 2nd round ng SAP
MANILA, Philippines — Nasa 17 milyong pamilya ang makikinabang sa second wave ng Social Amelioration Program.
Ito’y matapos ipag-utos ni Executive Secretary Salvador Medialdea sa Inter-Agency Task Force (IATF) for the Management of Emerging Infectious Diseases na isama sa mabibigyan ng tulong pinansiyal ang karagdagang 5 milyong pamilya.
Sa memorandum na inilabas ni Medialdea, inatasan nito ang IATF na isama ang 5 milyong pamilya sa 12 milyong benepisyaryo ng Assistance to Individuals in Crisis Situation (AICS) program ng Department of Social Welfare and Development (DSWD).
Sinabi rin ni Medialdea na posibleng ikonsidera pa rin na mabigyan ng pinansiyal na tulong ang mga mahihirap na pamilya na nakatira sa mga lugar na nasa general community quarantine (GCQ).
Inatasan na rin ang DSWD at ang Department of Information and Communications Technology (DICT), na bilisan ang pagbuo ng “online portal” na naglalaman ng mga pangalan ng mga benepisyaryo.
“The online portal must include a mechanism to receive feedback from the public to assist the government in assessing its performance in delivering the assistance, determining whether an investigation against specific persons is necessary, and identifying persons and areas that were not covered,” nakasaad sa memo.
- Latest
