Doctorate degree sa 'diplomacy' sasalubong kay Duterte sa Russia

MANILA, Philippines — Muling tatanggap ng honorary doctorate degree ang Pangulong Rodrigo Duterte kasabay ng kanyang ikalawang state visit sa Russia.

Ang pagtanggap na ito ay kinumpirma na rin ng Presidential Communications Operations Office.

Sinasabing honorary degree sa foreign diplomacy ang tatanggapin niya mula sa Moscow State Institute of International Relations University, kung saan magbibigay siya ng lecture.

Taong 2017 nang tumanggap din ng honorary doctorate degree si Duterte sa parehong institusyon.

Limang araw ang ilalagi ni Duterte sa Russia, matapos lumapag doon kanina.

Sa parehong pagbisita, kikitain niya sina Russian President Vladimir Putin at Russian Prime Minister Dmitry Medvedev ngayong Miyerkules kaugnay ng bilateral relations ng Maynila at Moscow.

Makikipag-usap din si Duterte kay Jordanian King Abdullah II Bin Al-Hussein bukas sa Sochi, timog ng Moscow.

Nakatakda ring magsalita ang kontrobersyal na presidente ng Pilipinas sa Valdai Forum, kung saan naimbitahan din ang iba pang world leaders.

Umaasa naman ang Department of National Defense na iaalok para sa Armed Forces of the Philippines ang ilang military hardware gaya ng submarines at multi-role fighters matapos ang mga serye ng engagements ni Duterte sa Russia.

"Oo naman, aalukin nila tayong bilhin ang equipment nila," sabi ni Defense Secretary Delfin Lorenzana sa Inggles.