Rep. Erice kumpiyansang pasok si Roxas sa top 12

MANILA, Philippines — Kumpiyansa si Caloocan City Congressman Egay Erice na makakabalik sa Senado si datibg Trade Secretary Mar Roxas dahil patuloy ang pagbuhos ng suporta sa kanya ng publiko.

Minaliit ni Erice ang inilabas na resulta ng Pulse Asia survey na nagpapakita na wala sa magic 12 ang pangunahing kandidato ng oposisyon.

Ayon kay Erice na campaign manager ni Roxas, masyado nang delayed ang April 10-14 Pulse survey dahil katapusan na ng buwan at marami nang nangyari sa nakaraang dalawang linggo.

Sinabi ni Erice na 10 araw nawala si Roxas dahil sinundo ang kanyang mag-iina sa Amerika pabalik ng bansa subalit naging agresibo ang kampanya at pag-iikot nito nang dumating.

“Kaya nga sa aming mga internal survey, kasama ang Magdalo survey na may petsang April 23 at 25, nasa top 12 na si Mar at naniniwala kaming patuloy pa itong tataas sa mga darating na araw,” sabi pa ni Erice.