MANILA, Philippines - Hinamon ni Albay Rep. Edcel Lagman ang Simbahang Katoliko na pabayaang maisabatas ang Reproductive Health bill upang makuwestyon nila sa Korte Suprema ang legalidad nito.
Sabi ni Lagman, masasagot lamang ang tanong ng mga Kaparian kung legal ba ang RH bill o hindi kapag naging batas ito.
Wika ni Lagman, ang depensa ng Simbahan na pinoproteksyunan ng Konstitusyon ang buhay ng hindi pa naipapanganak na bata ay para maiwasan na magkaroon ng batas sa aborsyon, na wala naman umano sa RH bill.
Hindi umano totoo na magiging legal ang aborsyon kapag naging batas ang RH Bill dahil ang contraceptives ay ginagamit para harangin ang pagbubuntis kaya wala pang fetus kapag ginamit ito ng mag-asawa.
“It is for this reason that contraceptives like pill, condoms, injectables and the IUD are medically certified as non-abortive or not abortifacients and are approved by the Food and Drug Administration. Contraceptives prevent fertilization, while abortion pre-terminates an existing pregnancy or conception,” punto pa ni Lagman.
Ayon kay Lagman, ang RH bill ay malinaw na magagamit ng mag-asawa para makontrol ang paglaki ng populasyon ng bansa.