Nagbabala kahapon si Justice Secretary Raul Gonzalez sa mga aplikante at sa mga testigo na nasa ilalim na ng Witness Protection program (WPP) na huwag nang hu miling ng isang safehouse na malapit sa mga malls o makaalis patungong abroad.
Ayon sa kalihim, siguradong hindi nila mapapagbigyan ang mga maluluhong kahilingan ng mga witnesses dahil sa ang budget lamang ng WPP ay P85 million na sapat lamang upang mabigyan sila ng sapat sa pangangailangan nila at ng kanilang pamilya.
Nilinaw pa ni Gonzalez na ang nasabing halaga ay hindi pa rin sasapat sa loob ng anim na buwan kung ang isang testigo ay hihiling ng maluhong pamumuhay.
“There are some witnesses who want to go to the United States. They expect us to support them even if they are already in the US? We cannot afford that,” ayon pa kay Gonzalez.
Dahil dito kaya ilan umano sa mga testigo ng gobyerno ay nagagalit sa pamahalaan dahil sa inaasahan ng mga ito na mabi bigyan sila ng bonus.
Samantala, pinag-aaralan naman ng DOJ kung isasailalim nila sa WPP ang mga witnesses sa RCBC robbery massacre sa Laguna. (Gemma Amargo-Garcia)