Bayani pinakakasuhan sa Ombudsman

Paiimbestigahan ni Parañaque City Rep. Roilo Golez si Metro Manila Development Authority (MMDA) Chairman Bayani Fernando sa Office of the Ombudsman dahil sa paggastos umano ng pondo ng kanyang tanggapan.

Sinabi rin ni Golez na hihilingin niya kay Ombudsman Merceditas Gutierrez na kasuhan at sampahan ng kaukulang kaso si Fernando dahil sa hindi umano pagbabayad nito sa loob ng dalawang taon ng P4,000 clothing allowance ng MMDA employees.

Sabi ni Golez, ang daming kinabit na tarpaulin na may litrato si Fernando sa kahabaan ng EDSA pero hindi naman nito kayang tumbasan ang benepisyo para sa kanyang mga empleyado.

Gusto ring ipakalkal ni Golez kung ginamit ni Fernando ang pondo ng MMDA sa pagpunta nito sa Aklan kasama ang may 100 tauhan niya.

Matatandaan na binaklas ng mga tauhan ni Makati City Jejomar Binay ang mga tarpaulin ni Fernado dahil nakakasagabal umano ito sa trapiko sa mga motoristang dumadaan sa may EDSA-Makati kamakailan na naging tampulan din ng bangayan ng dalawang opisyal.

Si Fernando ay napaulat na gustong kumandidato bilang Pangulo ng Pilipinas sa 2008 kaya naman iniisip ng kanyang mga kritiko na baka ang pondo ng kanyang tanggapan ang ginagamit daw nito sa maagang pangangampanya. (Butch Quejada)