Cheater nga Ex-BF

Dear Tito Miguel,

Ako diay si Danica nga taga Argao, Cebu. Ang akong ex-boyfriend nga si Mark kay ganahan makigbalik nako. Lima ka buwan na ang nilabay sukad mi nagbulag.

Gibuwagan nako si Mark tungod kay nasakpan nako kaniadto nga dunay laing girl. Dili lang kausa, kundili kapila na gyud. Tungod ana, napuno ko sa kasakit hangtod nakahukom ko nga undangon na namo ang among relasyon.

Karon, ganahan gyud siya nga makigbalik nako. Ana siya nga nakaamgo na siya sa iyang mga sayop ug nisaad nga mag-usab na siya. Nangayo siya og ikaduhang higayon ug gusto niya nga pamatud-an nako nga seryoso na siya.

Apan Tito Miguel, akong gipili nga dili siya tagdon. Dili tungod kay wala na koy pagbati, pero tungod kay nahadlok ko nga basin mausab ra gihapon ang tanan. Lisod kaayo para nako nga kalimtan ang mga higayon nga gibinuangan ko niya ug ang kasakit nga akong naagian.

Usahay, makahunahuna ko kung sakto ba akong gibuhat nga wala nako siya tagda. Basin tinuod gyud nga nakaamgo na siya ug gusto na niyang magbag-o. Pero unsaon man nako pagkahibalo kung tinuod ba gyud ang iyang gisulti? — Danica

* * *

Danica,

Dili ang pulong ang mopamatuod kun hingpit na ba siya nag-usab. Ang lihok mismo mao’y sukdanan. Gani, dili gihapon kini garantiya, posible pa mausab sa umaabot nga panahon. Sa laktod, ang relasyon sugal, dili sigurado ang tanan.

Kun gihigugma pa nimo siya ug andam ka mohatag niya’g laing higayon, mahimo gihapon. Dili tungod Kay nakaamgo na siya nga sayop ang magbudhi ug manlingla sa ka-relasyon, kun dili tungod kay natagbaw na siya sa pamabaye. Timan-i, kun nabuhat niya ang pagpamakak sa una kanimo, buhaton gihapon na niya sa umaabot. Igo ra na magmatngon, lahi na sab ang diskarte unsao’g tago aron dili masakpan.

Busa, andama imong kaugalingon nga ang pagbudhi kanimo iyang usbon. Pero lagi Kay ang tanan dili man matag-an, posible sab dili na niya buhaton. Sa laktod, panahon ra ang makatubag sa imong pangutana kun nag-usab na siya.

Kun pananglit modesisyon ka nga dili na mobalik niya, magpaabot o mangita’g lain, wala gihapo’y garantiya kun ligdong ba siya o tikasan. Pero kun maski duna pa kay pagbati niya, apan kaya na nimo nga wala siya, ayaw na lingi-a pa. Anugon ang pipila ka buwan nga imong paghinay hinay’g move on, igo ra diay ka mo u-turn. — Tito Miguel

Magpatambag ka? Ipada kang Tito Miguel: 0991-318-9366