Showbiz in a Year

CEBU, Philippines – “Gisaulog  karong adlawa  ang  25th anniversary sa Banat News  nga naghatod kaninyo sa nagbagang balita.Busa atong balikan ang 25  nga nagbagang balita sa showbiz world  gikan   Agosto 2018 hangtod 2019 . “

1.  KathNiel gipistahan

Dakong  kalampusan ang naangkon  sa pelikula  nila ni Kathryn Bernardo ug Daniel Padilla nga The Hows Of Us nga  nga ni-click gyud sa takilya. Sukad nga gipagawas kini sa mga sinehan niadtong Agosto 29, 2018, nitala kini og P800 million.

2. Kris sa Crazy Rich Asians

Bisan minos na kaayo og acting projects si Kris Aquino dinhi sa Pilipinas, nataypan ang iyang beauty sa usa ka international project.  Nalakip ang akres sa movie adaptation sa libro ni Kevin Kwan’ nga Crazy Rich Asians. Nidala siya isip Princess Intan, ug gikagobtan ang iyang paglugwa sa Hollywood premiere niini.

3. Regine mibalhinsa Kapamilya Network

Niadtong October 2018, nakugang gyud ang kadaghanan  sa pagbalhin sa  Asia’s Songbird nga si Regine Velasquez  ngadto sa sa Kapamilya Network. Nasayran nga 20 ka tuig na si  Regine sa GMA. Una na nga nibalhin sa ABS-CBN ang bana niya nga si  Ogie Alcasid. Maingon nga mao na kini ang usa sa mga sinyales nga mosunod siya niini. Sa pagbalhin ni Regine, emosyonal siya sa mainiton nga pagdawat sa mga Kapamilya stars kaniya.

4. Cebuana ang nakadaog

Ang 16 anyos nga taga Minglanilla, Cebu nga si Golden Cañedo maoy  natuboy nga grand  winner  sa The Clash sa GMA-7. Niabot ngadto sa 60 ka clashers ang nagtigi sa maong kompetisyon. Ang grand finals nahitabo niadtong October 1, 2018.

5. Nakarampa gyud

Mikisaw og maayo ang pangalan ni Kelsey Merritt, ang labing una nga Pinay nga  nakarampa sa runway sa Victoria Secret. Ang 21 anyos nga natawo sa Pampanga kinsa nangandoy lang kaniadto nga mahimong usa ka fashion model maoy  nahatagan og dakong kahigayunan nga makauban sa pagrampa ang mga giidolo niya  sa Victoria Secret nga sila si Adriana Lima, Behati Prinsloo, Martha Hunt, Kendall Jenner, Bella Hadid ug Gigi Hadid. Nahitabo kini niadtong November 12, 2018.

6. Shaila nagmadaogon

Ang pambato sa Sugbo nga si Shaila Rebortera maoy napili nga Miss Millennial Philippines 2018 sa Eat Bulaga niadtong October 27, 2018. May gitas-on nga 5’5 ug vital statistics nga 34-26-36, giasoy ni Shaila nga bag-o lamang siya niapil og mga indigay sa kaanyag. Kasamtangan siya nga brand ambassadress sa sikat nga spa sa Kabisay-an ug Mindanao nga mao ang Skin 911.

7. Glorious

Gikagubtan pag-ayo sa kadaghanan ang  digital movie  nga gibidahan nila ni Tony Labrusca ug Angel Aquino nga “Glorious”. Naukay ang kadaghanan gumikan sa intimate scenes nga gipagawas pa lang sa trailer. Gawas niana, daghan sab gyud ang ma-karelate gumikan  kay  mas maguwang pa ang babaye kay sa lalaki sa usa ka relasyon nga nahitabo na sab gyud tinuod nga kinabuhi. Maingon nga mao kini ang big break ni Tony sa iyang showbiz career tungod sa kamaayo niya modala sa  karakter isip  uyab ni Angel. Gisalida kini sa Iwant TV sa unang semana sa Nobiyembre.

8. Rayver mibalhinsa GMA

Human ni-expire ang iyang kontrata sa Star Magic, wala na mo-renew si Rayver Cruz sa maong talent agency. Sa unang semana niadtong Septiyember 2018, nipirma kini og kontrata sa GMA-7.   Susama na sila og mother network sa iyang  uyab nga si Janine Guttierez.

9. Janella gidapatan ni Elmo

Nikisaw niadtong Septiyember 2018 ang taho nga nagbuwag sila si Elmo Magalona ug Janella Salvador.  Giingong ugat sa ilang breakup mao ang pagpamun-og ni Elmo  ngadto kang Janella kun mahubog kini.  Suma pa ni Janella nga kaduha na ka higayon nga gidapatan siya sa aktor.

10. Nagsagunson

ang pelikula

Mapasalamaton kaayo si  Anne Curtis gumikan sa nagsagunson niya nga movie projects sa miaging tuig. Kini naglangkob sa  Buy Bust, Sid and Aya, ug  Aurora nga puros nakadawat og mga positibong feedback.

11. Pang-intenational

na ang beauty!

Dili na gyud mabangbang ang paglawig sa karera sa 21 anyos nga Kapamilya star nga si Maymay Entrata.  Nikulit  usab siya og atensyon  sa international scene. Sa hinapos nga bahin sa miaging tuig , nalakip ang aktres sa  mga nirampa sa  Arab Fashion Week. Human sa iyang pagrampa, natagad sab gyud ang iyang karisma sa sikat nga American model ug TV personality nga si Tyra Banks.

12. Sitang’s time

Nikisaw gyud  dinhi sa Pilipinas ang  pakalog nga dance steps sa Thai social media sensation nga si Mother Sitang nga nagpaila nga usa ka abogado.  Nitikang siya sa Pilipinas niadtong October 2018, ug  nanghatag og pahalipay sa mga batang kabus ug mibisita sab kini sa mga nagkadaiyang maanindot nga kasuroyan didto sa kauluhan. Apan kining tanan, paukyab ra diay gumikan kay nasakpan nga dili kini tinuod nga abogado didto sa Thailand ug  wala sab kini mihatag og hinabang ngadto sa mga biktima sa Yolanda. Ang pageant producer nga si Wilbert Tolentino mao mismo ang mibutyag sa tinuod nga baho ni Mother Sitang tungod sa iyang kasinatian nga gipangwartahan sab siya niini.

13. Tungod sa video greeting

Wala kaipsot si Cesar Montano sa init nga isyu human gipistahan sa  social media ang iyang   video greeting sa katapusang bahin sa October 2018. Nigama og video greeting ang aktor alang sa usa ka kagawad sa Sta. Ana, Manila nga dunay gitas-on nga 15 segundos.Naukyab ang netizens sa maong video  gumikan kay samtang nagtabi ang aktor, duna’y babaye nga nilugwa sa luyong bahin  niini.Naghubo ang maong babaye ug nagkuha kini og tualya. Wala hinuon naklaro ang dagway sa  babaye sa maong  video.

14. Kempee milugwa sa Dos

Human sa 16 ka tuig sa GMA-7,  nibalhin sa ABS-CBN ang  aktor nga si  Keempee de Leon niadtong  hinapos nga bahin niadtong  October 2018. Nalakip siya sa drama  series nga  Nang Ngumiti Ang Langit.

15. Rico Puno mipanaw

Nakabsan sa iyang kinabuhi niadtong   Oktubre 30, 2018  ang 65 anyos nga legendary singer nga si Rico J. Puno. Nalandig pa ang singer sa St. Luke’s Medical Center Global City Taguig gumikan sa heart failure.

16. Christian ug Kat nanumpa

Gikasal na sila si Christian Bautista ug Kat Ramnani niadtong November 17, 2018   didto sa Bali, Indonesia.Nakugang pag-ayo ang fans ni Christian sanglit wala gyud magsaba-saba ang singer kalabot niini. Nahibaw-an na lang kini sa publiko tungod sa ilang mga hulagway nga nikatap sa social media.

17. Rayna si Catriona

Nabawi sa Pilipinas ang korona ug titulo nga Miss Universe. Human kang Pia Wurtzbach niadtong 2015, nakuha ni Catriona Gray ang ikaupat nga korona nga alang sa atong nasud niadtong December 17, 2018.  Alang kang Catriona, mao kini ang labing hugyaw  nga Christmas gift nga iyang madalit sa tanang mga Pinoy. Mapasalamaton sab si Catriona nga wala siya  mapakyas sa iyang tinguha nga maangkon ang korona aron nga aduna sab gyud siya’y katungod nga mabuhat sa tibuok kalibutan ang iyang mga plano nga alang sa mga bata nga nanginahanglan og tumang pagtagad.

18. Kiray mibiya sa ABS-CBN

Niadtong December 20, 2018, nakugang ang fans ni Kiray Celis human nipirma kini og kontrata sa GMA-7.  Nagsugod ang career ni Kiray sa ABS-CBN sulod sa taas nga katuigan.

19. Pinay nakadaog sa X Factor Romania

Ang  Pinay nga nagikan sa Dasmariñas, Cavite nga si Bella Santiago maoy nidaog sa  X- Factor Romania niadtong December 23, 2018. Naa na sa ikawalo nga season sa maong kompetisyon ug mao kini ang unang higayon nga Pinay ang midaog sa maong sangka. Ang iyang contest piece nga usa ka mash up sa Beyonce originals nga “Love On Top” ug “Crazy In Love” maoy  naghatod kaniya sa kadaugan.

20. Kapuso na si Derek

Sa unang bahin sa 2019, nikisaw ang report kalabot sa pagtikang ni  Derek Ramsay sa GMA-7.    Nagikan si Derek sa ABS-CBN ug TV5 sa wala pa siya nibalhin sa GMA-7.  Nalakip  si Derek sa teleserye nga The Better Woman kauban si Andrea Torres.

21. Lig-ong teleserye

Dili gyud mabangbang ang nagkainit nga mga eksena sa teleserye sa ABS-CBN nga Kadenang Ginto nga gibituonan nila ni  Francine Diaz, Andrea Brillantes,  Beauty Gonzales ug Dimples Romana. Kanunay nga trending sa social ang kasagaran sa mga episode niini.

22. Cebuana mosangka sa Ms. Universe

Ang representante  sa Talisay City, Cebu nga si  Gazini Ganados maoy napili nga  Miss Universe-Philippines 2019 niadtong June 9, 2019.  Dakong hagit alang kang Gazini ang maong titulo sanglit siya ang mosangka sa Miss Universe 2019. Kasamtangang gihuptan sa Pilipinas ang maong titulo pinaagi sa kalampusan ni Catriona Gray.

23. Eddie Garcia mipanaw

Nagbangotan ang showbiz industry  sa pagpanaw beteranong aktor   nga si Eddie Garcia niadtong June 20, 2019.  Pipila ka adlaw nga na-comatose ang aktor human kini naaksidente sa taping sa usa ka serye sa GMA-7.

24. Bea –Gerald issue

Naukyab ang  mga tsismosa  sa report sa katapusang bahin niadtong  Hulyo 2019   kalabot sa breakup nila ni Gerald Anderson ug Bea Alonzo.    Suma pa ni Bea nga si Gerald maoy namiya kaniya nga wala nagpahibalo. Dinhi nisikat ang termino nga “ghosting” nga naghulagway sa usa ka tawo nga kalit mamiya sa ilang hinigugma. Naamong sa maong isyu ang aktres nga si Julia Barretto kinsa nalambigit kang Gerald.  Nikatap ang hulagway nila ni Julia ug Gerald  nga nag-uban sa birthday party ni Rayver Cruz.

25. KathDen  gihangop

Gihangop gyud sa publiko ang labing una nga panagpares nila ni Alden Richards ug Kathryn Bernardo sa usa ka pelikula.  Ni-click gyud ang ilang tandem sa pelikulang Hello Love Goodbye. Sulod sa 17 ka adlaw nga pagpasalida niini, nikita na kini og kapin sa P700 million. Sa Hong Kong gi-shoot ang maong pelikula. Si Cathy Molina ang direktor niini.