Failure means do more

Nakakita ko adtong Biyernes og Magandang Buhay, ang bag-ong morning show sa ABS-CBN diin sila si Karla Estrada, Melai Cantiveros ug Jolina Magdangal ang mga hosts. Duha ka set  ilang guests. Una mao ang magsuong beauty queens nga sila si Bianca ug Nichole Manalo. Ang ikaduha sila si Ethel Booba ug Boobita. About man to sa managsuon in the same industry ilang topic, pero ang nakakawat sa akong pagtagad gyud ang interview sa Manalo sisters.

Kanang mga Manalo kay family of beauty queens gyud na sila. Ang ilang iyaan nga Nini Ramos maoy pambato sa Pilipinas sa Miss International 1968, diin nasulod kini sa Top 15 semi-finalists. Ang maguwang nila ni Bianca ug Nichole nga si Kate maoy representante sa nasud atol sa Miss World 2002, diin nalakip siya sa Top 10 finalists. Si Bianca ang pambato sa Pilipinas atol sa Miss Universe 2009. Nahisgutan sab atol sa interview nga ang ilang inahan kay nakuronahan sab atol sa usa ka pageant sa ilang syudad. Silang tanan, gawas kang Nichole puros take one or nidaog dayon sa una pa lang nilang salmot og pageant.

Nichole is a different story. Niapil na siya sa Bb. Pilipinas pageant niadtong 2014 diin kutob ra siya sa semi-final round or Top 15. Apan lahi siya sa iyang mga maguwang nga beauty queens  sanglit sila si Kate ug Bianca mga models na daan, una pa nisalmot og Bb. Pilipinas. Si Nichole walay background sa modeling ug nidiretso lang og apil. Apan nasulod siya sa Top 15. Kini maoy hinungdan nga nihukom siya nga musalmot pagbalik, apan siguraduhon na gyud niya matud pa nga mupailawom siya og labihan ka higpit nga training.

Giangkon ni Nichole nga naguol gyud siya nga wala siya nakadaog niadtong 2014. Siya ra gyud nilang tanang magsuon ang napildi. Upat sila ka managsuong babaye. Ang ikatulo nila walay hilig og beauty pageant. Siya maoy kamanghuran. Apan matud pa ni Nichole nga human sa maong kapildihan, didto niya mas nasabtan unsa gyuy gusto niyang mahitabo sa iyang kaugalingon. Kini walay lain kundili ang mamahimong beauty  queen sama sa iyang mga maguwang. Busa gipangandaman niya ang Bb. Pilipinas 2016 pageant, diin niining higayona nagmadaugon na gyud siya. Si Nichole ang nakoronahan isip Bb. Pilipinas Globe.

Didto ko nakahinuklog sa hilom samtang nagpaminaw nila. Kinahanglan nga dili gyud ta mu-surrender lagi. Kun mapalpak ta sa sinugdanan, kinahanglang dili ta magpanghadlok nga manimpad pag-usab. Apan siguraduhon nato nga doble na gyud atong paningkamot. So kun nahagbong ka sa imong major subject last semester o sa board examination, balik gyud apan siguradoa nga mas lig-on, mas andam ug mas maningkamot na gyud ka. Kay kun palpak ka sa sinugdanan, wala na nagpasabot nga pulpol ka, bogo ka or wala kay ayo. Failure does not define you. It is what you do after you failed that will prove your real worth.

 Si Pia Wurtzbach bitaw katulo man gyud niapil usa pa na rayna. Si senator-elect Riza Hontiverros sab kaduha napildi, usa pa gyud hingpit nasulod sa Top 12 niadtong nilabay nga eleksyon. So try and try until you succeed. Pero ayaw sab na og abusoha nga quote kay naa manay limit. Kay ang sumpay ana kay kini man, “But after your third try and you still failed, think of something else.” Sa tagalog pa, mag-isip-isip ka na. Kay basin og dili gyud na para imoha, mao nga bisa’g unsaon pa nimo og paningkamot dili gyud na nimo maangkon.  Pakkk!