CEBU, Philippines — Si Ron Dennison milansang og hagpok kaayong 3-pointer sa pinal nga 12.4 segundos sa dihang gipiog sa Cebu Greats ang Batangas City Tanduay Athletics sa pinakanipis nga gintang, 78-77, sa Game 1 sa ilang best-of-three South Division quarterfinal series sa SportPlus Maharlika Pilipinas Basketball League (MPBL) 2026 Season niadtong Miyerkules, Oktubre 7, sa Quezon Convention Center sa Lucena City.
Sa dihang naglabaw ang Batangas og dos puntos sa naghinapos nga bahin sa duwa, si Dennison milansang og krusyal nga tres gikan sa maanindot nga pasa ni Jun Manzo aron aswaton ang Cebu ngadto sa kulbahinam nga kadaogan.
Ang Batangas aduna pa untay tsansa nga ilogon ang labaw apan si Jeckster Apinan nasipyat sa iyang layup sa katapusang 3.8 segundos.
Si Dennison mitapos uban ang 11 puntos, tulo ka rebounds, upat ka assists ug duha ka steals.
Si Manzo maoy nangu sa Cebu uban ang 21 puntos, usa ka rebound, duha ka assists ug tulo ka steals, samtang si Simon Camacho midugang og 12 puntos, unom ka rebounds, upat ka assists ug tulo ka steals.
Dako sab og naambag si Dhon Reverente, nga mipupo og 11 puntos, siyam ka rebounds, tulo ka assists ug duha ka steals.
Ang Game 2 gikatakda karong Oktubre 14 sa Batangas City Coliseum, diin ang Cebu naglaraw nga moangkon og luna sa semifinals.