CEBU, Philippines — Modepensa sa iyang trono atubangan sa iyang mga katagilungsod sa usa ka mahinungdanong away nga ipasalida live sa telebisyon, dili opsiyon ang kapildihan alang ni Regie "The Filipino Phenom" Suganob.
Uban niining paminsar, si Suganob (14-1, 4KOs) misaad nga buhaton ang tanan aron molampus sa dihang panalipdan na niya ang iyang World Boxing Organization (WBO) Global light flyweight title batok sa Hapon nga challenger nga si Kai Ishizawa (11-3, 10KOs) sa main event sa gikahinaman nga "Kumong Bol-anon 15" fight card sa PMI Bohol Boxing Promotions karong adlawa (Martes, Abril 30) didto sa Holy Name University (HNU) Barder Gym sa Tagbilaran City.
Gawas nga proteksiyonan ang hataas niyang puwesto sa world rankings diin siya rated No.4 sa WBO, No.9 sa World Boxing Council (WBC), ug No.6 sa International Boxing Federation (IBF), ang 26-anyos nga Suganob nakakuha og dugang motibasyon nga mohimo og impresyon gumikan kay ang 12 ka hugna nilang rambol ni Ishizawa i-live man sa PTV Network Channel sugod sa alas-3 sa Hapon. Duna say live-streaming niini sa Facebook page ug YouTube channel sa PTV.
"Kani nga duwa nindot kaayo ni. Paningkamotan gyud ni nako nga modaog ko," matud pa ni Suganob, nga modepensa sa unang higayon sa rehiyonal nga bakus sa WBO nga iyang nasakmit human gibuntog si Venezuelan Ronald Chacon pinaagi sa unanimous decision niadtong Nobiembre 4 sa miaging tuig didto sa Bohol Wisdom School (BWS) Gym sa Tagbilaran gihapon.
"Sa preparation nako, almost five months akoa training mao nang maka-ingon ko nga andam na kaayo ko aning awaya," dugang pa ni Suganob. "Dili ko mo-predict og knockout kay adto rana nato makita sa duwa."
Sa iyang pakigharong ni Ishizawa, ang labing unang Hapon nga mopakita'g aksiyon sa tulo ka tuig nga kasaysayan sa malampuson nga boxing series sa PMI Bohol ubos sa paggiya ni Atty. Floriezyl Echavez Podot, si Suganob naglantaw sa unahan nga mamahimo kini niyang hagdanan nga maka-away og balik alang sa world title. "Siyempre part na sa akong goal, nga maka-away balik og world title fight," dason pa ni Suganob, nga napilde pinaagi sa desisyon batol ni IBF 108-pound champion Sivenathi Nontshinga sa unang niyang pagsuway alang sa kalibutanhong korona niadtong Hulyo 2, 2023 didto sa International Convention Center sa East London, South Africa.
Dili hinoon angayan nga mokompiyansa si Sunganob kay si Ishizawa nanganti nga mohimo og usa ka dakong surprisa sa iyang pagpanulong sa Bohol.
"I have a good chance that is why I come here," dason pa ni Ishizawa pinaagi sa usa ka interpreter. "I'm going to win by knockout but I can't say what round because that is part of my strategy."
Sa laing bahin, ang stablemate ni Suganob nga si "Sugar" Shane Gentallan (8-1, 5KOs) makigbinukbukay ni Indonesian Wandi Priman Hulu (2-1-1) s supporting main event nga gikatakda sa walo ka hugna.
Sa undercards, ang managsoong Althea Shine, Sugarey Leonard, ug Leonard Pores gikan sa Claveria, Misamis Oriental mowadwad sab sa ilang abilidad.
Si Althea Shine mosakbang ni Renz Dacquel sa Manila alang sa Philippine women's light flyweight title, si Sugarey Leonard makigsangka ni Roel Julian sa Bukidnon, samtang si Leonard makigsinukmagay ni Jaren Jase Guarin sa Haiyan Punch Boxing sa Tacloban.
Sa laing sangka, si Arlando Senoc Jr. sa Big Yellow Gym sa Sugbo makig-atbang ni Kier Torregosa sa Buenavista, Bohol.