Protesta sa Knicks gibasura sa NBA

CEBU, Philippines — Gibasura sa NBA ang protesta nga gisang-at sa New York Knicks human sa 105-103 nilang kaparotan ngadto sa Houston Rockets niadtong Pebrero 12 bisan og kini nagagikan sa sipyat sa reperi.

Sa maong duwa, nagtabla ang duha ka koponan sa iskor nga 103-103 sa hilimatyong segundos sa dihang si Jalen Brunson sa Knicks gitawgan og foul tungod kay nakahimo og kontak ni Aaron Holiday sa Rockets samtang mitira kini og 3-point shot.

Si Holiday kalmadong milansang og duha ka free throws human sa foul ni Brunson aron itunol sa Rockets ang kadaogan.

Sa pagprotesta nila sa resulta, ang Knicks milalis nga sayop ang pagtawag og shooting foul batok ni Brunson kay dili man tinuyoan ang pagka-igo niini sa lawas ni Holiday sa maong krusyal nga play.

Si referee crew chief Ed Malloy namahayag human sa duwa nga nagtoo siya nga nakahimo og foul si Bruson apan ang slow-motion replay nagpakita nga nasayop siya sa iyang away.

Ang report sa NBA sa katapusang dos minutos misuporta sa Knicks diin kini nagkanayon nga ang reperi nasipyat gyud sa iyang tawag. Kini nagpasabot nga si Holiday wala na unta makaitsa pa sa free throw line.   

Bisan pa man niini, ang NBA wala modapig sa Knicks kay ila man gihapon gisalikway ang protesta niini.

Sa kasamtangan, ang Knicks ikaupat sa Eastern Conference uban ang 35-24 rekord bisan og napilde kapito sa miagi nilang 10 ka duwa.