Ancajas, Inoue andam nang magbinukbukay

CEBU, Philippines — Ang Pinoy'ng boksidor nga si Jerwin Ancajas nagpanikad nang makigsinukmagay ni WBA bantamweight champion Takuma Inoue karong Sabado didto sa Kokugikan Arena sa Tokyo, Japan.

Si Ancajas, nga kanhi naghari isip IBF super flyweight champion, nagakanayon nga taas siya og respeto ni Inoue apan dili siya magpanuko pagpatikangkang niini kon ugaling mo-abot ang oportunidad.

 Hindi naman natin siya ina-underestimate,  dason pa sa 32-anyos nga si Ancajas.

 Try natin. Subukan natin makakuha ng opening. Magandang bonus kung may knockout,  dugang pa ni niya.

Malisud hinoon nga tahas ang sagubangon ni Ancajas gumikan kay ang 28-anyos nga si Inoue, nga manghud ni undisputed world bantamweight champion Naoya Inoue, wa pa matumba bisan kausa sa iyang karera.

Inilog man tuod ug mo-away sa iyang teritoryo apan si Inoue mipadangat sab sa iyang pagtamod ni Ancajas isip lig-ong kontra nga iya pa ganing gi-idolo.

 Ancajas is the best fighter I will ever face,  matud pa ni Inoue.  I idolize Ancajas. 

Si Inoue nagkupot og 18-1 rekord uban ang 4KOs, samtang si Ancajas nagtangag og 34-3-2 nga baraha uban ang 23KOs.