Wembanyama napuhalan sa NBA 'Rising Stars'
CEBU, Philippines — Nabaraw ang panghinaut ni Victor Wembanyama nga dominahon ang 'Rising Stars' nga torneyo nga maoy misikad sa NBA All-Star Week human ang iyang koponan napilde sa semifinals kagahapong adlawa didto sa Gainbridge Fieldhouse sa Indianapolis, Indiana.
Ang superstar rookie sa San Antonio Spurs maoy nangu sa lig-on kaayong lineup sa team ubos ni coach Pau Gasol diin daghan ang nagtoo nga makasud sa final.
Apan ang ilang mga kaatbang, luyo sa pagtimon ni coach Detlef Schrempf ug gibunlot gikan sa NBA G-League, mihimo og usa ka dakong surprisa.
Si Mac McClung mikadlit og 12 puntos samtang si Alondes Williams midugang og 11 puntos sa dihang ang mga underdogs mipakurat sa puwersa ni Wembanyama, 41-36, sa semis.
Ang No.1 overall pick sa miaging NBA Draft nga si Wembanyama mipupo og 11 puntos, pito ka rebounds, duha ka blocks, ug usa ka steal apan dili kini igo aron ituboy ang Team Paul ngadto sa kadaogan.
Wala damha ang maong kapakyasan ilabi na kay ang mga kauban ni Wembanyama naglangkob man nilang Brandin Podziemski sa Golden State Warriors ug ang No.2 draft pick nga si Brandon Miller sa Charlotte Hornets.
Imbes nga manghawod, sila maoy nakugang gumikan kay ang Team Detlef misutoy ngadto sa 23-13 nga labaw ug wala na molingi pa.
Wala hinoon makalahutay ngadto sa ilang tuyo nga korona ang Team Detlef human gilampaso sa team ubos ni coach Jalen Rose sa final, 26-13.
- Latest
